ສະຖານທີ່ລົງທຶນ
ຄູ່ມື VSEZA
ຕິດຕໍ່ພວກເຮົາທ່ານ ອານຸພາບ ຕຸນາລົມ ຄະນະເລຂາທິການສູນກາງພັກ, ເລຂາຄະນະພັກ, ປະທານສະພາປະຊາຊົນນະຄອນຫລວງວຽງຈັນ ພ້ອມດ້ວຍຄະນະ ລົງຢ້ຽມຢາມ ແລະ ຊີ້ນຳວຽກງານ ຢູ່ເຂດພັດທະນາກວມລວມໄຊເຊດຖາ ນະຄອນຫຼວງວຽງຈັນ.
ໃນຕອນເຊົ້າ ວັນທີ 8 ເມສາ 2025, ທີ່ຜ່ານມາ ທ່ານ ອານຸພາບ ຕຸນາລົມ ຄະນະເລຂາທິການສູນກາງພັກ, ເລຂາຄະນະພັກ, ປະທານສະພາປະຊາຊົນນະຄອນຫຼວງວຽງຈັນ ໄດ້ນຳພາຄະນະ ລົງຢ້ຽມຢາມ ແລະ ຊີ້ນຳວຽກງານຢູ່ເຂດພັດທະນາກວມລວມໄຊເຊດຖາ. ໂດຍການຕ້ອນຮັບຢ່າງອົບອຸ່ນຂອງທ່ານ ທະນົງໄຊ ຄຸດໄພທູນ ຫົວໜ້າຄະນະຄຸ້ມຄອງເຂດເສດຖະກິດພິເສດ ນະຄອນຫຼວງວຽງຈັນ, ທ່ານ ຊົງຈູນ ຜູ້ອຳນວຍການ ບໍລິສັດຮ່ວມທຶນ ລາວ-ຈີນ ຈຳກັດ, ພ້ອມດ້ວຍຕົວແທນຂອງບໍລິສັດ ທີ່ລົງທຶນໃນເຂດ.
ໃນໂອກາດນີ້, ທ່ານ ອະນຸພາບ ຕຸນາລົມ ໄດ້ເຂົ້າຢ້ຽມຊົມຊົມບໍລິສັດ ເປເຕີ້ເຄື່ອງນຸ່ງ (ລາວ) ຈຳກັດ, ບໍລິສັດ ຈ່ຽງຊູ ຈົງຫຼຸ້ນເຕັກໂນໂລຊີ (ລາວ) ຈຳກັດ ແລະ ບໍລິສັດອື່ນໆ ເພື່ອເບິ່ງສະພາບການຜະລິດ, ການຈ້າງງານ ແລະ ແຜນການຂະຫຍາຍການລົງທຶນຂອງບໍລິສັດດັ່ງກ່າວໃນອະນາຄົດ. ຊຶ່ງທ່ານ ຍ້ອງຍໍ ແລະ ຕີລາຄາສູງ ຕໍ່ບັນດາບໍລິສັດທີ່ໄດ້ມີສ່ວນຮ່ວມໃນການພັດທະນາເສດຖະກິດ-ສັງຄົມ ແລະ ການສ້າງວຽກເຮັດງານທຳໃຫ້ປະຊາຊົນລາວ.
ຈາກນັ້ນ, ໄດ້ມີການຈັດກອງປະຊຸມ ເພື່ອຮັບຟັງການລາຍງານກ່ຽວກັບການດໍາເນີນງານຂອງເຂດພັດທະນາ, ຊຶ່ງມີລາຍລະອຽດຄື: ເຂດພັດທະນາ ໄດ້ແບ່ງເປັນ 3 ໄລຍະຄື: ໄລຍະທີ 1 ພັດທະນາ 400 ເຮັກຕາ ໂດຍພັດທະນາອຸດສາຫະກຳການຜະລິດ; ໄລຍະທີສອງ ແລະ ທີສາມ ແມ່ນພັດທະນາເປັນເຂດການຄ້າ, ການທ່ອງທ່ຽວ ແລະ ພະຍາຍາມສ້າງເປັນຕົວເມືອງໃໝ່ ຂອງນະຄອນຫລວງວຽງຈັນ. ປັດຈຸບັນ, ມີວິສາຫະກິດ 160 ຫົວໜ່ວຍ ໄດ້ເຂົ້າລົງທຶນ ຢູ່ເຂດພັດທະນາກວມລວມໄຊເຊດຖາ, ໃນນີ້ ມີ 88 ຫົວໜ່ວຍ ໄດ້ສ້າງສຳເລັດ ແລະ ເລີ່ມການຜະລິດ, ຄາດວ່າຖ້າວິສາຫະກິດທັງໝົດ 160 ຫົວໜ່ວຍ ເລີ່ມດຳເນີນການຜະລິດ ມູນຄ່າການຜະລິດຕໍ່ປີຈະບັນລຸເຖິງ 3 ຕື້ໂດລາສະຫະລັດ ແລະ ຈະສາມາດສ້າງວຽກເຮັດງານທຳໄດ້ປະມານ 17.000 ກວ່າຕໍາແໜ່ງງານ.
ໃນກອງປະຊຸມຍັງໄດ້ຮັບຟັງຂໍ້ສະເໜີ ແລະ ຂໍ້ຄິດເຫັນຈາກບັນດາບໍລິບໍລິສັດທີ່ເຂົ້າມາລົງທຶນຢູ່ໃນເຂດພັດທະນາກວມລວມໄຊເຊດຖາ. ທ່ານ ອານຸພາບ ຕຸນາລົມ ໄດ້ເນັ້ນໃຫ້ເຫັນວ່າ: ເຂດພັດທະນາກວມລວມໄຊເຊດຖາ ເປັນໂຄງການຮ່ວມມືລະດັບຊາດ ທີລັດຖະບານ ສອງປະເທດ ລາວ ແລະ ຈີນ ໄດ້ກຳນົດຮ່ວມກັນ, ທັງເປັນເຂດຮ່ວມມືເສດຖະກິດການຄ້າ ລະດັບຊາດ ຂອງ ສປ ຈີນ ໜຶ່ງດຽວຢູ່ ສປປ ລາວ ແລະ ເປັນໂຄງການທຳອິດທີ່ໄດ້ຈັດເຂົ້າໃນແຜນຍຸດທະສາດ ໜຶ່ງແລວໜຶ່ງເສັ້ນທາງ ທີ່ໄດ້ຮັບຄວາມເອົາໃຈໃສ່ ແລະ ສະໜັບສະໜູນ ຈາກລັດຖະບານທັງສອງປະເທດ. ຂະນະດຽວກັນ, ທ່ານໄດ້ໃຫ້ຊີ້ນຳໃຫ້ເຂດພັດທະນາສືບຕໍ່ເອົາໃຈໃສ່ປັບປຸງລະບົບການບໍລິການ, ປັບປຸງສະພາບແວດລ້ອມການລົງທຶນໃຫ້ດີຂຶ້ນກວ່າເກົ່າ ເພື່ອສ້າງເງື່ອນໄຂດຶງດູດເອົາບໍລິສັດທີ່ມີສັກກາຍາພາບ ແລະ ນຳໃຊ້ເຕັກໂນໂລຊີຂັ້ນສູງ ມາລົງທຶນຢູ່ເຂດພັດທະນາກວມລວມໄຊເຊດຖາໃນອານາຄົດໃຫ້ຫຼາຍຂຶ້ນກວ່າເກົ່າ ເພື່ອສ້າງຄວາມເຂັ້ມແຂງ ໃຫ້ແກ່ການຜະລິດພາຍໃນ, ສາມາດຕອບສະໜອງການຊົມໃຊ້ ຢູ່ພາຍໃນ ແລະ ເປັນສິນຄ້າສົ່ງອອກ ເພື່ອດຶງເອົາເງິນຕາເຂົ້າປະເທດ, ປະກອບສ່ວນສໍາຄັນ ເຂົ້າໃນການແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນ-ເງິນຕາ ໃນປັດຈຸບັນ ແລະ ສ້າງຄວາມເຂັ້ມແຂງໃຫ້ແກ່ລະບົບເສດຖະກິດແຫ່ງຊາດໃນຕໍ່ໜ້າ.
ຄະນະຄຸ້ມຄອງເຂດເສດຖະກິດພິເສດນະຄອນຫຼວງວຽງຈັນ
Vientiane Spacial Economic Zone Authority
ຕິດຕໍ່ພວກເຮົາ
ເບີໂທ : +856 21 419336
ແຟັກ : +856 21 419336
ອີເມວ : info@vseza.gov.la
ຜູ້ເຂົ້າຊົມເວັບໄຊ
10342
Copyright ©
2023 VSEZA , All rights reserved