ສະຖານທີ່ລົງທຶນ
ຄູ່ມື VSEZA
ຕິດຕໍ່ພວກເຮົາຄະນະຄຸ້ມຄອງເຂດເສດຖະກິດພິເສດ ນະຄອນຫຼວງວຽງຈັນ ເຂົ້າຮ່ວມກອງປະຊຸມສະຫຼຸບຖອດຖອນບົດຮຽນ ການພັດທະນາ ແລະ ຄຸ້ມຄອງເຂດເສດຖະກິດພິເສດ ໃນໄລຍະ 2016-2020 ແລະ ທິດທາງແຜນການ 2021-2025
ໃນວັນທີ 08 ທັນວາ 2021 ນີ້ໄດ້ມີກອງປະຊຸມສະຫຼຸບຖອດຖອນບົດຮຽນ ການພັດທະນາ ແລະ ຄຸ້ມຄອງເຂດເສດຖະກິດພິເສດ ໃນໄລຍະ 2016-2020 ແລະ ທິດທາງແຜນການ 2021-2025 ຜ່ານລະບົບ Online (ZOOM) ພາຍໃຕ້ການເປັນປະທານຂອງ ທ່ານ ສອນໄຊ ສີພັນດອນ, ຮອງນາຍົກລັດຖະມົນຕີ, ລັດຖະມົນຕີ ກະຊວງແຜນການ ແລະ ການລົງທຶນ, ໂດຍມີທ່ານ ນາງ ຄໍາຈັນ ວົງແສນບູນ, ຮອງລັດຖະມົນຕີກະຊວງແຜນການ ແລະ ການລົງທຶນ, ບັນດາທ່ານຮອງລັດຖະມົນຕີ, ທ່ານຮອງເຈົ້າຄອງ, ບັນດາທ່ານຮອງເຈົ້າແຂວງ ບ່ອນເຂດເສດຖະກິດພິເສດຕັ້ງຢູ່, ພາກສ່ວນທີ່ກ່ຽວຂ້ອງທັງສູນກາງ ແລະ ທ້ອງຖິ່ນ, ຜູ້ພັດທະນາບັນດາເຂດເສດຖະກິດພິເສດ ໃນຂອບເຂດທົ່ວປະເທດ ເຂົ້າຮ່ວມກອງປະຊຸມຜ່ານລະບົບທາງໄກ.
ຊຶ່ງໃນກອງປະຊຸມ ທ່ານ ສອນໄຊ ສີພັນດອນ ໄດ້ກ່າວວ່າ ການພັດທະນາເຂດເສດຖະກິດພິເສດຢູ່ປະເທດເຮົາ ມີລັກສະນະ ແລະ ຈຸດພິເສດທີ່ແຕກຕ່າງກັບການພັດທະນາເຂດເສດຖະກິດພິເສດຢູ່ບັນດາປະເທດອື່ນໆ ຍ້ອນທີ່ຕັ້ງພູມສັນຖານປະເທດເຮົາບໍ່ມີຊາຍແດນຕິດຈອດກັບທະເລ ແລະ ງົບປະມານໃນການພັດທະນາພື້ນຖານໂຄງລ່າງມີຈຳກັດ. ລັດຖະບານ ຈື່ງໄດ້ສົ່ງເສີມໃຫ້ຜູ້ພັດທະນາເອກະຊົນທັງພາຍໃນ ແລະ ຕ່າງປະເທດ ເຂົ້າມາລົງທຶນ ໂດຍໃຫ້ນະໂຍບາຍສົ່ງເສີມພິເສດ ແລະ ມີການບໍລິຫານຄຸ້ມຄອງສະເພາະ ເພື່ອສົ່ງເສີມການລົງທຶນ ເຂົ້າມາໃນໂຄງການ. ອີງໃສ່ການຖອດຖອນບົດຮຽນຈາກສາກົນ ການພັດທະນາເຂດເສດຖະກິດພິເສດ ກໍ່ໄດ້ປັບປຸງໃຫ້ເຂົ້າກັບສະພາບ ແລະ ສະພາບຕົວຈິງຂອງປະເທດເຮົາ, ຖ້າຈະເວົ້າແລ້ວວຽກງານການພັດທະນາເຂດເສດຖະກິດພິເສດຂອງພວກເຮົາ ທີ່ຈັດຕັ້ງປະຕິບັດຢູ່ໃນປະຈຸບັນນີ້ ເນື້ອແທ້ກໍ່ແມ່ນການຜັນຂະຫຍາຍມະຕິກອງປະຊຸມໃຫຍ່ຂອງພັກ, ແຜນພັດທະນາເສດຖະກິດ-ສັງຄົມແຫ່ງຊາດໃນແຕ່ລະໄລຍະ ແລະ ກົດໝາຍສົ່ງເສີມການລົງທຶນ.
ໃນໂອກາດເຂົ້າຮ່ວມກອງປະຊຸມ ທ່ານ ທະນົງໄຊ ຄຸດໄພທູນ, ຫົວໜ້າຄະນະຄຸ້ມຄອງເຂດເສດຖະກິດພິເສດ ນະຄອນຫຼວງວຽງຈັນ ກໍ່ໄດ້ລາຍງານສະພາບວຽກງານ ຂສພ ຢູ່ນະຄອນຫຼວງວຽງຈັນ ຊຶ່ງມາຮອດປະຈຸບັນເຂດເສດຖະກິດພິເສດ ນະຄອນຫຼວງວຽງຈັນ ມີບໍລິສັດມາຈົດທະບຽນທັງໝົດ 184 ບໍລິສັດ, ມີທຶນຈົດທະບຽນ 780 ລ້ານໂດລາສະຫະລັດ, ແຜນການລົງທຶນ 6 ຕື້ໂດລາສະຫະລັດ; ມູນຄ່າການລົງທຶນຕົວຈິງ 2,78 ຕື້ໂດລາສະຫະລັດ; ສະເພາະປີ 2021 ມີບໍລິສັດຈົດທະບຽນລົງທຶນໃໝ່ ຈໍານວນ 22 ບໍລິສັດ ທຶນຈົດທະບຽນ 27 ລ້ານໂດລາສະຫະລັດ ແລະ ແຜນລົງທຶນ 43 ລ້ານໂດລາສະຫະລັດ ເມື່ອທຽບໃສ່ແຜນການດືງດູດການລົງທຶນປະຈໍາປີທີ່ວາງໄວ້ ສາມາດປະຕິບັດໄດ້ 110 % (ລື່ນຄາດໝາຍ 2 ບໍລິສັດ). ສາມາດດຶງດູດການລົງທຶນບໍລິສັດທີ່ມີຊື່ສຽງ ແລະ ມີປະສົບການໃນການດໍາເນີນທຸລະກິດ ເຊັນ: ບໍລິສັດ ຜະລິດຢາໂກເດັນວິດສະດອມ ລາວ ຈຳກັດ ດໍາເນີນການຜະລິດ, ຈຳໜ່າຍຜະລິດຕະພັນຢາ ແລະ ຜະລິດຕະພັນເສີມສຸກຂະພາບ, ບໍລິສັດ ຄວາມຫວັງໃໝ່ ຈຳກັດ ຜະລິດຫົວອາຫານສັດ ເພື່ອຈຳໜ່າຍທັງພາຍໃນ ແລະ ສົ່ງອອກຕ່າງປະເທດ, ບໍລິສັດ ໂຮຢາລາວ ຈຳກັດ ຈາກປະເທດ ຍີ່ປຸ່ນ ຜະລິດແຜນແກ້ວຣາດດິດເພື່ອສົ່ງອອກ, ບໍລິສັດ ເປໂຕເຄມີ ລາວ ຈຳກັດ ໂຮງງານກັ່ນນໍ້າມັນ ແລະ ຜະລິດນ້ຳມັນສໍາເລັດຮູບ ຈໍາໜ່າຍພາຍໃນ ແລະ ຕ່າງປະເທດ. ສ້າງວຽກເຮັດງານທໍາໄດ້ທັງໝົດ 5,579 ຕໍາແໜ່ງງານ ປະກອບສ່ວນປະຕິບັດພັນທະອາກອນຕ່າງໆເຂົ້າງົບປະມານໄດ້ທັງໝົດ ຈໍານວນ 95,87 ຕື້ກີບ.
ນອກຈາກນີ້, ຄະນະຄຸ້ມຄອງເຂດເສດຖະກິດພິເສດ ນະຄອນຫຼວງວຽງຈັນ ໄດ້ນໍາໃຊ້ລະບົບເອເລັກໂທນິກເຂົ້າໃນວຽກງານຕ່າງໆເຊັ່ນ: ການອອກໃບທະບຽນວິສາຫະກິດ, ໃບຢັ້ງຢືນສິດໃຊ້ທີ່ດິນ ແລະ ອະສັງຫາລິມະຊັບ, ແລະ ຍັງໄດ້ນໍາໃຊ້ລະບົບການຮັບເອກະສານເຂົ້າ-ອອກ ດ້ວຍລະບົບເອເລັກໂຕນິກ ຊຶ່ງມີຄວາມສະດວກ, ຄວາມວ່ອງໄວໃນການຮັບ-ສົ່ງເອກະສານ. ສໍາລັບການປັບປຸງກົນໄກການບໍລິການປະຕູດຽວ ໄດ້ການສ້າງຄູ່ມືແນະນໍາກ່ຽວກັບການລົງທຶນ ແລະ ສ້າງໜ່ວຍງານບໍລິການປະຕູດຽວປະຈໍາແຕ່ລະເຂດ ຮ່ວມກັບຂະແໜງການທີ່ກ່ຽວຂ້ອງເພື່ອອໍານວຍຄວາມສະດວກການລົງທຶນ.
ຄະນະຄຸ້ມຄອງເຂດເສດຖະກິດພິເສດນະຄອນຫຼວງວຽງຈັນ
Vientiane Spacial Economic Zone Authority
ຕິດຕໍ່ພວກເຮົາ
ເບີໂທ : +856 21 419336
ແຟັກ : +856 21 419336
ອີເມວ : info@vseza.gov.la
ຜູ້ເຂົ້າຊົມເວັບໄຊ
6552
Copyright ©
2023 VSEZA , All rights reserved