LA 

ແຂວງຈໍາປາສັກ ເດີນທາງມາແລກປ່ຽນ ແລະ ຖອດຖອນບົດຮຽນການພັດທະນາເຂດເສດຖະກິດພິເສດ ແລະ ການຄຸ້ມຄອງທ່າບົກ ຢູ່ນະຄອນຫຼວງວຽງຈັນ

   

            ໃນວັນທີ 22 ທັນວາ 2021 ຜ່ານມາ ອົງການປົກຄອງແຂວງຈໍາປາສັກ ນໍາໂດຍທ່ານ ສົມບູນ ເຮືອງວົງສັກ, ຮອງເຈົ້າແຂວງແຂວງຈໍາປາສັກ ໄດ້ນໍາພາ ພະແນກການພາຍໃນແຂວງ ເດີນທາງມາແລກປ່ຽນ ແລະ ຖອດຖອນບົດຮຽນການພັດທະນາເຂດເສດຖະກິດພິເສດ ແລະ ການຄຸ້ມຄອງທ່າບົກ ຢູ່ນະຄອນຫຼວງວຽງຈັນ ໂດຍການຕ້ອນຮັບຂອງ ທ່ານ ພູໂຂງ ບັນນາວົງ, ຮອງເຈົ້າຄອງນະຄອນຫຼວງວຽງຈັນ, ທ່ານ ສອນປະເສີດ ດາລາວົງ, ວ່າການຫົວໜ້າຫ້ອງການສົ່ງເສີມ ແລະ ຄຸ້ມຄອງເຂດເສດຖະກິດພິເສດ, ກະຊວງແຜນການ ແລະ ການລົງທຶນ, ທ່ານ ທະນົງໄຊ ຄຸດໄພທູນ, ຫົວໜ້າຄະນະຄຸ້ມຄອງເຂດເສດຖະກິດພິເສດ ນະຄອນຫຼວງວຽງຈັນ ພ້ອມດ້ວຍບັນດາພະແນກການທີ່ກ່ຽວຂ້ອງຂອງນະຄອນຫຼວງເຂົ້າຮ່ວມ.
ຈຸດປະສົງຂອງການເດີນທາງມາຄັ້ງນີ້ ກໍ່ເພື່ອເປັນການພົບປະແລກປ່ຽນບົດຮຽນ ແລະ ປະສົບປະການໃນການຄຸ້ມຄອງເຂດເສດຖະກິດພິເສດ ແລະ ທ່າບົກ (Dry port) ເນື່ອງຈາກ ນະຄອນຫຼວງວຽງຈັນ ແລະ ແຂວງຈໍາປາສັກ ກໍ່ລ້ວນແລ້ວແຕ່ມີເຂດເສດຖະກິດພິເສດ ແລະ ທ່າບົກເຊັ່ນດຽວກັນ ສະນັ້ນເປັນໂອກາດອັນດີໃຫ້ແກ່ການແລກປ່ຽນບົດຮຽນໃນວຽກງານດັ່ງກ່າວ.
ໃນໂອກາດນີ້ ທ່ານ ທະນົງໄຊ ຄຸດໄພທູນ, ຫົວໜ້າຄະນະຄຸ້ມຄອງເຂດເສດຖະກິດພິເສດ ນະຄອນຫຼວງຈັນ ໄດ້ລາຍງານວ່າ ປະຈຸບັນຢູ່ ນະຄອນຫຼວງວຽງຈັນ ໄດ້ມີເຂດເສດຖະກິດພິເສດທັງໝົດ 05 ແຫ່ງ ຊຶ່ງນໍາໃຊ້ເນື້ອທີ່ດິນພຽງແຕ່ 2.300 ເຮັກຕາ, ໄດ້ມີບໍລິສັດເຂົ້າມາຈົດທະບຽນລົງທຶນ 186 ບໍລິສັດ ແລະ ສາມາດສ້າງສ້າງວຽກເຮັດງານທໍາໄດ້ 5.969 ຄົນ. ສ່ວນການເກັບລາຍຮັບສະເພາະປີ 2021 ແມ່ນປະຕິບັດໄດ້ 78,5 ຕື້ກີບ ແລະ ຄາດວ່າຈະເພີ່ມຂຶ້ນອີກຫຼາຍເທົ່າຕົວໃນອະນາຄົດເນື່ອງຈາກຫຼາຍໂຮງງານໄດ້ສ້າງສໍາເລັດ ແລະ ເພີ່ມກຳລັງການຜະລິດເປັນຕົ້ນແມ່ນ ບໍລິສັດ ໂຮງຢາລາວຈໍາກັດ ທີ່ມີແຜນຂະຫຍາຍກຳລັງການຜະລິດ ລວມເຖິງໂຮງກັ່ນນໍ້າມັນເປໂຕຣເຄມີລາວ ກໍ່ໄດ້ສາມາດຜະລິດໄດ້ເຕັມກຳລັງພາຍຫຼັງທໍາການທົດລອງມາໄດ້ໄລຍະໜຶ່ງ. ສ່ວນກົນໄກການຄຸ້ມຄອງແມ່ນໄດ້ນໍາໃຊ້ກົນໄກບໍລິການຜ່ານປະຕູດຽວ (OSS) ຊຶ່ງນອກຈາກຈະໄດ້ກຳນົດຢູ່ໃນກົດໝາຍວ່າດ້ວຍການສົ່ງເສີມການລົງທຶນ ແລະ ດຳລັດວ່າດ້ວຍເຂດເສດຖະກິດພິເສດແລ້ວ ອຳນາດການປົກຄອງນະຄອນຫຼວງວຽງຈັນ ຍັງໄດ້ຜັນຂະຫຍາຍ ກຽມອອກຂໍ້ຕົກລົງເພື່ອແຕ່ຕັ້ງບັນດາຂະແໜງການທີ່ກ່ຽວຂ້ອງເຂົ້າປະຈໍາການເພື່ອອຳນວຍຄວາມສະດວກໃຫ້ກັບທີ່. ພ້ອມກັນນີ້ ຄະນະຄຸ້ມຄອງເຂດ ຍັງໄດ້ນໍາເອົາເຄື່ອງມືເອເລັກໂຕນິກ ແລະ ລະບົບໂປແກຣມຕ່າງໆເຂົ້າມາຕິດຕັ້ງ ເພື່ອເຊື່ອມໂຍງກັບລະບົບການຕິດຕາມຄຸ້ມຄອງຂອງຂະແໜງການ ທັງນີ້ກໍ່ເພື່ອກ້າວໄປສ່ການເຫັນເປັນທັນສະໄໝ ແລະ ໂປ່ງໃສ ສາມາດຕິດຕາມກວດກາໄດ້.
            ໃນໂອກາດເດີນທາງມາຢ້ຽມຢາມ ນະຄອນຫຼວງວຽງຈັນ ຄະນະຜູ້ແທນແຂວງຈໍາປາສັກ ຍັງໄດ້ເດີນທາງໄປຢ້ຽມຢາມ ເຂດເສດຖະກິດພິເສດ ບຶງທາດຫຼງ ແລະ ເຂດVientiane Logistics Park ຊຶ່ງເຂດການຂົນສົ່ງແບບຄົບວົງຈອນທີ່ມີເອົາທັງຈຸດບໍລິການທີ່ເປັນທ່າບົກ Dry port ທີ່ຕັ້ງຢູ່ທ່ານາແລ້ງ ໃກ້ກັບຂົວມິດຕະພາບລາວ-ໄທ ແຫ່ງທີ I.



ຄະນະຄຸ້ມຄອງເຂດເສດຖະກິດພິເສດນະຄອນຫຼວງວຽງຈັນ
Vientiane Spacial Economic Zone Authority
ຕິດຕໍ່ພວກເຮົາ

ເບີໂທ : +856 21 419336
ແຟັກ : +856 21 419336
ອີເມວ : info@vseza.gov.la

ຜູ້ເຂົ້າຊົມເວັບໄຊ

6552
Copyright © 2023 VSEZA , All rights reserved