ໃນຕອນເຊົ້າຂອງວັນທີ 30 ທັນວາ 2021 ຄະນະຄຸ້ມຄອງເຂດເສດຖະກິດພິເສດ ນະຄອນຫຼວງວຽງຈັນ ໄດ້ຈັດກອງປະຊຸມ ສະຫຼຸບການຈັດຕັ້ງປະຕິບັດວຽກງານ ປະຈຳປີ 2021 ແລະ ທິດທາງແຜນການ ປີ 2022 ພາຍໃຕ້ການເປັນປະທານຂອງ ທ່ານ ທະນົງໄຊ ຄຸດໄພທູນ, ຫົວໜ້າຄະນະຄຸ້ມຄອງເຂດເສດຖະກິດພິເສດ ນະຄອນຫຼວງວຽງຈັນ ໂດຍມີພະນັກງານຫຼັກແຫຼ່ງທັງໝົດເຂົ້າຮ່ວມ.

ໃນກອງປະຊຸມໄດ້ຮັບການລາຍງານສະພາບການຈັດຕັ້ງປະຕິບັດວຽກງານຢູ່ ເຂດເສດຖະກິດພິເສດ ທີ່​ຂຶ້ນ​ກັບ​ການ​ຄຸ້ມ​ຄອງຄະນະຄຸ້ມຄອງເຂດເສດຖະກິດພິເສດ ນະຄອນຫຼວງວຽງຈັນ (ຄ​ຂ​ສ​ພ.ນວ)​ ຈໍານວນ 05 ເຂດ ຄື: (1) ເຂດພັດ​ທະ​ນາກວມ​ລວມ​ໄຊ​ເຊດ​ຖາ, (2) ຂສພ ບຶງ​ທາດຫຼວງ, (3) ຂສພ ລ່ອງ​ແທ່ງ-ວຽງ​ຈັນ, (4) ຂສພ ດົງ​ໂພ​ສີ ແລະ (5) ເຂດວຽງຈັນ​ໂລ​ຊິດ​ສະ​ຕິກ. ຊຶ່ງຕະຫຼອດໄລຍະປີ 2021 ຜ່ານມາ ສາມາດດຶງດູດການລົງທຶນ ໄດ້ຈໍານວນ 24 ບໍລິສັດ ເມື່ອທຽບໃສ່ແຜນການດຶງດູດການລົງທຶນປະຈໍາປີທີ່ວາງໄວ້ ສາມາດປະຕິບັດໄດ້ 120% (ລື່ນຄາດໝາຍ 4 ບໍລິສັດ) ມີມູນຄ່າການລົງທຶນຕົວຈິງປະຈໍາປີ ຈໍານວນ 144,88 ລ້ານໂດລາສະຫະລັດ. ສາມາດປະຕິບັດພັນທະຕາມສັນຍາສຳປະທານເຂົ້າງົບປະມານລັດ ໄດ້ທັງໝົດ 78,5 ຕື້ກວ່າກີບ (ທຽບໃສ່ປີ 2020 ແມ່ນ​ລື່ນ​ຄາດ​ໝາຍຫຼາຍ​ເທົ່າ). ສ່ວນດ້ານຕົວເລກແຮງງານປະຈໍາປີ 2021 ກໍ່ເພີ່ມຂື້ນຕື່ມອີກ 3,234 ຕໍາແໜ່ງງານ ລວມແຮງງານທີ່ເຮັດວຽກໃນ ຂສພ ນະຄອນຫຼວງວຽງຈັນ ມີຫຼາຍເຖິງ 5,969 ຄົນ ໃນນີ້ແຮງງານລາວກວມ 4,726 ຄົນ (79%) ໃນນີ້ ໄດ້ຮັບການຢາສັກວັກຊິນປ້ອງກັນພະຍາດໂຄວິດ-19 ແລ້ວເກືອບຄົບຫມົດທຸກຄົນ ໄປຄຽງຄູ່ກັບການປະຕິບັດບັນດາມາດຕະການຕ່າງທີ່ທາງຄະນະສະເພາະກິດວາງອອກ.

ກອງປະຊຸມໄດ້ເປີດໂອກາດໃຫ້ບັນດາຂະແໜງ ແລະ ພະນັກງານວິຊາການພາຍໃນ ຄຂພສ.ນວ ແລກປ່ຽນຄໍາຄິດຄໍາເຫັນຮ່ວມກັນ ເພື່ອເຮັດແນວໃດໃຫ້ບັນດາຄາດໝາຍສູ້ຊົນຕ່າງໆສາມາດຈັດຕັ້ງໄດ້ຢ່າງມີປະສິດທິຜົນ. ໃນໂອກາດນີ້ ທ່ານ ທະນົງໄຊ ຄຸດໄພທູນ ໄດ້ກ່າວວ່າ ໃນປີ 2021 ນີ້ ກໍ່ເປັນອີກໜຶ່ງປີທີ່ພວກເຮົາຍັງປະເຊີນໜ້າກັບການແຜ່ລະບາດຂອງພະຍາດໂຄວິດ-19 ໂດຍສະເພາະການເກີດຂື້ນຂອງສາຍພັນໃໝ່ ທີ່ໄດ້ກະທົບໄປທົ່ວທຸກມູນໂລກ ລວມເຖິງ ສປປ ລາວ ຊຶ່ງວຽກງານການພັດທະນາເຂດເສດຖະກິດພິເສດຂອງພວກເຮົາ ກໍ່ບໍ່ສາມາດຫຼີກລ້ຽງໄດ້ຕໍ່ກັບຜົນກະທົບດັ່ງກ່າວ. ແຕ່ເຖິງຢ່າງໃດກໍ່ຕາມ ດ້ວຍຄວາມເອົາໃຈໃສ່ຈາກຄະນະນຳຂັ້ນເທິງ ແລະ ຄວາມສະດຸ້ງໄວຂອງອ້າຍນ້ອງພະນັກງານພວກເຮົາ ຈຶ່ງສາມາດບັນລຸຄາດໝາຍສູ້ຊົນໄດ້ຫຼາຍວຽກຕາມແຜນການທີ່ວາງໄວ້ ແລະ ເພື່ອເປັນບ່ອນອີງໃຫ້ແກ່ການຈັດຕັ້ງປະຕິບັດໃນປີ 2022 ບັນດາຂະແໜງພາຍໃນ ຄຂສພ.ນວ ຈະຕ້ອງໄດ້ສຸມໃສ່ບັນດາໜ້າວຽກ ດັ່ງນີ້:
- ປະສານງານກັບຜູ້ພັດທະນາທັງ 05 ເຂດເພື່ອໃຫ້ໄດ້ຕິດຕັ້ງລະບົບການບໍລິການລົງທຶນປະຕູດຽວປະຈຳເຂດໃຫ້ສຳເລັດພາຍໃນຕົ້ນປີ 2022 ນີ້ ແລະ ສືບຕໍ່ວຽກງານການອອກໃບຢັ້ງຢືນແຫຼ່ງກຳເນີດສິນຄ້າ (CO) ໃຫ້ສຳເລັດ;
- ກວດກາຄືນສະຖິຕິການອອກໃບຕາດິນ, ອະສັງຫາລິມະຊັບ ພາຍໃນ 05 ເຂດແລ້ວເອົາຂໍ້ມູນດັ່ງກ່າວເຂົ້າໃສລະບົບເພື່ອເປັນຖານຂໍ້ມູນ; ສຳລັບການຊົດເຊີຍທີ່ດິນນັ້ນແມ່ນໃຫ້ສະຫຼຸບລາຍລະອຽດໃຫ້ຄົບຖ້ວນ ແລະ ຊັດເຈນ;
- ປະສານງານກັບພາກສ່ວນທີ່ກ່ຽວຂ້ອງລົງເກັບກຳສະຖິຕິແຮງງານທີ່ອອກແຮງງານພາຍໃນ 05 ເຂດເຊັ່ນ: ບ່ອນພັກເຊົ່າ, ຄ່າແຮງ, ສັນຍາ ແລະ ອື່ນໆອອກເປັນອັນລະອຽດໃຫ້ສຳເລັດພາຍໃນຕົ້ນປີ 2022 ເພື່ອເປັນບ່ອນອີງໃນການຂໍອະນຸມັດນຳເຂົ້າແຮງງານປະຈຳປີ 2022;
- ໃຫ້ຮີບຮ້ອນເກັບກຳສະຖິຕິແຮງງານທີ່ມີຢູ່ໃນປັດຈຸບັນເຂົ້າໃນຖານຂໍ້ມູນໃຫ້ສຳເລັດໂດຍໄວ;
- ສືບຕໍ່ວຽກງານປ້ອງກັນການແຜ່ລະບາດຂອງພະຍາດໂຄວິດ-19 ໂດຍໃຫ້ເນັ້ນໜັກໃສ່ກ່ຽວກັບວຽກງານຄຸ້ມຄອງເຊັນ: ໂຮງງານ, ໂຄງການກໍ່ສ້າງ, ຕະຫຼາດ ແລະ ຈຳນວນຜູ້ທີ່ໄດ້ຮັບວັກຊີນເພື່ອສົ່ງໃຫ້ແກ່ພາກສ່ວນທີ່ກ່ຽວຂ້ອງຢ່າງເປັນປະຈຳ; ພ້ອມທັງໃຫ້ປະສານງານກັບໜ່ວຍງານສະເພາະກິດ ແລະ ພາກສ່ວນທີ່ກ່ຽວຂ້ອງເພື່ອລົງມາສັກຢາຕ້ານພະຍາດໂຄວິດ-19;
- ສ້າງກົນໄກການປະສານງານພາຍໃນ 04 ຂະແໜງ ແລະ ພາກສ່ວນທີ່ກ່ຽວຂ້ອງເພື່ອກຳນົດມື້ສົ່ງບົດສະຫຼຸບຕ່າງໆໃຫ້ສອດຄ່ອງ ແລະ ທັນກັບເວລາທີ່ທາງພາກສ່ວນທີ່ກ່ຽວຂ້ອງຕ້ອງການ.