ໃນຕອນບ່າຍຂອງວັນທີ 13 ມັງກອນ 2021 ທີ່ຜ່ານມາ ຫ້ອງການ ຄະນະຄຸ້ມຄອງເຂດເສດຖະກິດພິເສດ ນະຄອນຫຼວງວຽງຈັນ (ຄຂສພ.ນວ) ໄດ້ຈັດພິທີເລື່ອນມະຫາຊົນຜູ້ກ້າວຫນ້າເປັນສະມາຊິກພັກສຳຮອງ ພາຍໃຕ້ການເປັນປະທານຂອງສະຫາຍ ທະນົງໄຊ ຄຸດໄພທູນ, ເລຂາໜ່ວຍພັກ, ຫົວໜ້າຄະນະຄຸ້ມຄອງເຂດເສດຖະກິດພິເສດ ນະຄອນຫຼວງວຽງຈັນ ໂດຍມີຜູ້ຕ່າງໜ້າຈາກ ຫ້ອງການສົ່ງເສີມ ແລະຄຸ້ມຄອງເຂດເສດຖະກິດພິເສດ, ກະຊວງແຜນການ ແລະ ການລົງທຶນ; ຜູ້ຕາງໜ້າຈາກອົງການປົກຄອງນະຄອນຫຼວງວຽງຈັນ ແລະ ສະມາຊິກພັກ-ພະນັກງານພາຍໃນ ຄຂສພ ນະຄອນຫຼວງວຽງຈັນ ເຂົ້າຮ່ວມ.

ໃນໂອກາດນີ້ ສຫ ທະນົງໄຊ ຄຸດໄພທູນ ໄດ້ໂອ້ລົມ ແລະ ທິດຊີ້ນຳວ່າ ຜ່ານການຊີ້ນໍາ-ນໍາພາ, ຕິດຕາມ ກວດກາກໍ່ສ້າງເຊິ່ງກັນ ແລະ ກັນໃນໄລຍະຜ່ານມາຂອງໜ່ວຍພັກ ຄຂສພ ນະຄອນຫຼວງວຽງຈັນ ໃນໄລຍະຜ່ານມາ ເຫັນວ່າໜ່ວຍພັກສາມາດຍາດໄດ້ຜົນງານຫຼາຍດ້ານເປັນຕົ້ນແມ່ນຕົວເລກການເຂົ້າມາລົງທຶນຂອງບັນດາຫົວໜ່ວຍວິສາຫະກິດທີ່ນັບມື້ເພີ່ມຂຶ້ນ ໂດຍສະເພາະແມ່ນມີ 2021 ມີບໍລິສັດເຂົ້າມາລົງທຶນເພີ່ມອີກ 24 ບໍລິສັດ, ມີມູນຄ່າລົງທຶນຕົວຈິງ 144,88 ລ້ານໂດລາສະຫະລັດ ແລະ ມີແຮງງານເຂົ້າມາເຮັດວຽກຢູ່ພາຍໃນເຂດແລ້ວ 5.969 ຕໍາແໜ່ງງານ ໃນນີ້ເປັນແຮງງານລາວ 4.726 ບໍລິສັດ ແລະ ວຽກງານປິ່ນອ້ອມອື່ນໆ ບັນດາຜົນງານດັ່ງກ່າວມັນໄດ້ເປັນການປະກອບສ່ວນອັນສໍາຄັນ ຕໍ່ໜ້າທີ່ການເມືອງຂອງທຸກສະຫາຍສະມາຊິກ ພາຍໃນໜ່ວຍພັກ ຕໍ່ກັບການຜັນຂະຫຍາຍບັນດາມະຕິຄໍາສັ່ງ ແລະ ແຈ້ງການໃນແຕ່ລະໄລຍະເຂົ້າສູ່ໜ້າວຽກຕົວຈິງຢ່າງມີຄວາມຮັບຜິດຊອບ ໂດຍສະເພາະການເຮັດບົດບາດເປັນເສນາທິການໃຫ້ແກ່ ຄະນະບໍລິຫານງານພັກ ນະຄອນຫຼວງວຽງຈັນ.

ສຫ ເລຂາ ຫນ່ວຍພັກ ຍັງໄດ້ເນັ້ນໜັກໃຫ້ບັນດາສະມາຊິກພັກ-ພະນັກງານພາຍໃນໜ່ວຍພັກ ຄຂສພ ນະຄອນຫຼວງວຽງຈັນ ຈົ່ງໄດ້ສຶບຕໍ່ຮັກສາຄຸນທາດການເມືອງ, ຄຸນສົມບັດສິນທໍາປະຕິວັດ, ທິດສະດີມາກ-ເລນິນ, ແນວຄິດປະທານໄກສອນ ພົມວິຫານ, ແບບແຜນການດຳລົງຊີວິດ, ແບບແຜນການນໍາພາ, ຍົກສູງຄວາມຮັບຜິດຊອບ, ມີສະຕິຕໍ່ການຈັດຕັ້ງ, ລະບຽບວິໃນ ແລະ ຄວາມເປັນແບບຢ່າງນໍາໜ້າ, ຕ້ານແນວຄິດອາຍາສິດ, ສໍ້ລາດບັງຫຼວງ, ຈຸ້ມເຈຶ້ອງເຊື້ອສາຍ, ທ້ອງຖິ່ນ, ສ່ວຍໃຊ້ໜ້າທີ່ຕໍາແໜ່ງ, ຫຼິ້ນກິນຟຸມເຟືອຍ ແລະ ສິ່ງຫຍໍ້ທໍ້ຕ່າງໆ ເພື່ອເຮັດແນວໃດໃຫ້ໜ່ວຍພັກ ຄຂສພ ນະຄອນຫຼວງວຽງຈັນ ກາຍເປັນໜ່ວຍພັກປອດໃສ, ເຂັ້ມແຂງ ໜັກແໜ້ນ. ພິເສດ ຕໍ່ກັບສະມາຊິກພັກສຳຮອງໃຫມ່ ໃຫ້ເອົາໃຈໃສ່ ດັ່ງນີ້:
- ຝຶກຜົນຫລໍ່ຫອມຕົນເອງ ທາງດ້ານຄຸນທາດການເມືອງ, ຄຸນສົມບັດສີນທຳປະຕິວັດ, ແບບແຜນດຳລົງຊີວິດ; ຍົກສູງຄວາມຮັບຜິດຊອບທາງດ້ານການເມືອງ, ມີສະຕິຕໍ່ການຈັດຕັ້ງ, ລະບຽບວິໄນ ແລະ ຄວາມເປັນແບບຢ່າງນຳໜ້າ;
- ຕ້ານແນວຄິດອາຍາສິດ, ສໍ້ລາດບັງຫຼວງ, ແນວຄິດເອກະຊົນ, ຈຸ້ມເຈື້ອເຊື້ອສາຍ, ສວຍໃຊ້ໜ້າທີ່ຕຳແໜ່ງ, ຫຼີ້ນກີນຟູມເຟືອຍ ແລະ ສິ່ງຫຍໍ້ທໍ້ອື່ນໆ;
- ຕັ້ງໜ້າຮ່ຳຮຽນທິດສະດີມາກ-ເລນີນ, ແນວຄິດໄກສອນ ພົມວິຫານ, ແນວທາງແຜນນະໂຍບາຍ, ກົດລະບຽບພັກ, ກົດໝາຍ ແລະ ລະບຽບການຂອງລັດ;
- ລວມທັງ ວຽກງານວິຊາສະເພາະ ແນໃສ່ເຮັດສຳເລັດທຸກໜ້າທີ່ ວຽກງານທີ່ການຈັດຕັ້ງ ແລະ ຂັ້ນເທິງມອບໝາຍໃຫ້;
- ສະເໜີໃຫ້ ສຫ ສະມາຊິກພັກ ສົມບູນ 2 ສະຫາຍ ແລະ ສະມາຊິກພັກທຸກສະຫາຍ ໃຫ້ພ້ອມກັນສຶບຕໍ່ຕິດຕາມກໍ່ສ້າງ ສຫ ສະມາຊິກພັກສຳຮອງ ໃນໄລຍະສະໄຫມສຳຮອງນີ້ ໃຫ້ສາມາດບັນລຸຕາມຈຸດປະສົງເປົ້າ ແລະ ຂໍ້ກຳນົດຕ່າງທີ່ໄດ້ລະບຸໄວ້ໃນກົດລະບຽບພັກ.