ຄະນະຄຸ້ມຄອງເຂດເສດຖະກິດພິເສດ ນະຄອນຫຼວງວຽງຈັນ ຈັດກິດຈະກຳຮ່ວມກັບ ອົງການປົກຄອງເມືອງໄຊເສດຖາ ເພື່ອຕ້ອນຮັບວັນກໍາມະກອນສາກົນ ວັນທີ 01 ພຶດສະພາ 2022 ຄົບຮອບ 136 ປີ

   


================================

ໃນຕອນແລງຂອງວັນທີ 28 ເມສາ 2022 ຄະນະຄຸ້ມຄອງເຂດເສດຖະກິດພິເສດ ນະຄອນຫຼວງວຽງຈັນ ໄດ້ສ້າງຂະບວນການກິລາເຕະບານມິດຕະພາບ ຮ່ວມກັບ ອົງການປົກຄອງເມືອງໄຊເສດຖາ, ນະຄອນຫຼວງວຽງຈັນ ເພື່ອຕ້ອນຮັບວັນກໍາມະກອນສາກົນ ວັນທີ 01 ພຶດສະພາ 2022 ຄົບຮອບ 136 ປີ ໂດຍການເຂົ້າຮ່ວມຂອງທ່ານ ຄຳມາ ແສງມີໄຊ ເຈົ້າເມືອງ ເມືອງໄຊເຊດຖາ, ນະຄອນຫຼວງວຽງຈັນ, ທ່ານ ທະນົງໄຊ ຄຸດໄພທູນ ຫົວໜ້າ ຄະນະຄຸ້ມຄອງເຂດເສດຖະກິດພິເສດ ນະຄອນຫຼວງວຽງຈັນ ໂດຍມີພະນັກງານຫຼັກແຫຼ່ງ ແລະ ນັກກິລາຂອງທັງສອງພາກສ່ວນເຂົ້າຮ່ວມ.

ຈຸດປະສົງຂອງການຈັດກິລາບານເຕະມິດຕະພາບຄັ້ງນີ້ ແມ່ນປະຕິບັດຕາມແຈ້ງການຂອງສູນກາງສະຫະພັນກຳມະບານລາວ ສະບັບເລກທີ 440/ສກລ, ລົງວັນທີ 08 ເມສາ 2022 ວ່າດ້ວຍການສະເຫຼີມສະຫຼອງວັນກໍາມະກອນສາກົນ ຄົບຮອບ 136 ປີ ໃຫ້ມີຄວາມໝາຍ, ຄວາມສໍາຄັນ ແລະ ບັນຍາກາດອັນຟົດຟື້ນ.

ສໍາລັບວັນກຳມະກອນສາກົນ ເຊິ່ງກົງກັບວັນທີ 01 ພຶດສະພາ ຂອງທຸກໆປີ ແມ່ນມື້ທີ່ໃຫ້ທຸກຄົນໄດ້ລະນຶກເຖິງຄວາມສຳຄັນຂອງຊົນຊັ້ນກຳມະກອນ ແລະ ຊາວຜູ້ອອກແຮງງານທີ່ໄດ້ຕໍ່ສູ້ເພື່ອຄວາມເປັນທໍາໃນການອອກແຮງງານ ນັບຕັ້ງແຕ່ຍຸກຂະຫຍາຍຕົວດ້ານອຸດສາຫະກຳເປັນຕົ້ນມາ ຊຶ່ງວັນດັ່ງກ່າວໄດ້ກາຍເປັນສັນຍາລັກອັນຊອບທໍາຂອງການປະຕິບັດສິດສະເໜີພາບລະຫວ່າງຜູ້ໃຊ້ແຮງງານ ແລະ ນາຍຈ້າງ. ຊຶ່ງຊາວຜູ້ອອກແຮງງານບໍ່ວ່າຈະຢູ່ໃນຂົງເຂດໃດ ກໍ່ລ້ວນແຕ່ເປັນແຮງຂັບເຄື່ອນເສດຖະກິດໃນທຸກພາກສ່ວນ, ໂດຍສະເພາະ ສປປ ລາວ ຂອງພວກເຮົາທີ່ກຳລັງຢູ່ໃນໄລຍະສ້າງສາພັດທະນາກໍຄືຫັນເປັນອຸດສາຫະກຳ ແລະ ທັນສະໄໝເທື່ອລະກ້າວ. ສະນັ້ນ, ການຂະຫຍາຍຕົວຂອງຊົນຊັ້ນກຳມະກອນລາວເຮົາ ແມ່ນການປະກອບສ່ວນເຂົ້າໃນແຜນພັດທະນາເສດຖະກິດ-ສັງຄົມ ໃນຍຸກສະໄໝແຫ່ງການປົກປັກຮັກສາ ແລະ ພັດທະນາປະເທດຊາດ ພາຍໄຕ້ການຊີ້ນຳ-ນຳພາຂອງພັກປະຊາຊົນປະຕິວັດລາວ. ດັ່ງຄຳຂັວນວັນທີ 01 ພຶດສະພາ 2022 ທີ່ວ່າ:

1. ນ້ຳໃຈວັນທີ 01 ພຶດສະພາ ໝັ້ນຍືນ.
2. ຊົມເຊີຍວັນທີ 01 ພຶດສະພາ ຄົບຮອບ 136 ປີ ຢ່າງສຸດໃຈ.
3. ກຳມະບານລາວເຂັ້ມແຂງ, ທັນສະໄໝ, ສາມັກຄີ, ມີວິໄນ ແລະ ນ້ຳໃຈສາກົນກຳມະຊີບ.
4. ເພີ່ມທະວີຄວາມສາມັກຄີກັບຂະບວນການກຳມະກອນສາກົນ ເພື່ອຮັກສາເອກະລາດ, ສັນຕິພາບ ແລະ ຄວາມຍຸດຕິທຳ.

+