ໃນຕົ້ນປີ 2022 ທີ່ຜ່ານມາ, ຄະນະຄຸ້ມຄອງເຂດເສດຖະກິດພິເສດ ນະຄອນຫຼວງວຽງຈັນ (ຄຂສພ.ນວ) ນໍາໂດຍ ທ່ານ ທະນົງໄຊ ຄຸດໄພທູນ, ຫົວໜ້າຄະນະຄຸ້ມຄອງເຂດເສດຖະກິດພິເສດ ນະຄອນຫຼວງວຽງຈັນ ພ້ອມຄະນະ ໄດ້ລົງເຮັດວຽກຢູ່ບັນດາ ຂສພ ຮ່ວມກັບກຳລັງປ້ອງກັນຄວາມສະຫງົບທີ່ຖືກແຕ່ງຕັ້ງມາປະຈໍາໃນເຂດເສດຖະກິດພິເສດ ນະຄອນຫຼວງວຽງຈັນ ຈໍານວນ 05 ເຂດ ເພື່ອສະຫຼຸບຖອດຖອນວຽກງານປ້ອງກັນຄວາມສະຫງົບພາຍໃນເຂດ ໃນໄລຍະ 2021 ຜ່ານມາ ແລະ ທິດທາງແຜນການໃນປີ 2022.

ປະຈຸບັນໃນຈຳນວນ 5 ເຂດເສດຖະກິດພິເສດ ນະຄອນຫລວງວຽງຈັນ ມີກໍາລັງປ້ອງກັນຊາດ-ປ້ອງກັນຄວາມສະຫງົບ ແລະ ເຈົ້າໜ້າທີ່ຮັກສາຄວາມປອດໄຟ (ລປພ) ຈໍານວນ 105 ນາຍ, ທະຫານ 12 ນາຍ, ຕໍາຫຼວດ 39 ນາຍ ແລະ (ລປພ) 54 ຄົນ ເພື່ອຮັກສາຄວາມສະຫງົບ, ປອດໄພ ແລະ ແກ້ໄຂປະກົດການຫຍໍ້ທໍ້ ເຊັ່ນ: ການແກ້ໄຂອຸບັດຕິເຫດ, ການປຸ້ນຈີ້ຊິງສັບ, ການລັກຈູບປ່າ, ທຸບກຳແພງ, ປ່ອຍສັດ, ແຂ່ງ​ລົດ​ກວນ​ເມືອງ, ອະຄິໄຟ, ການແກ້ໄຂບັນຫາຂີ້ລັກ.

ໃນໂອກາດນີ້ ທ່ານ ທະນົງໄຊ ຄຸດໄພທູນ, ໄດ້ກ່າວວ່າ ວຽກງານປ້ອງກັນຄວາມສະຫງົບເປັນວຽກງານໜຶ່ງທີ່ສໍາຄັນ ເພື່ອສ້າງຄວາມເຊື່ອໝັ້ນໃຫ້ແກ່ຜູ້ພັດທະນາ, ຜູ້ລົງທຶນ, ຜູ້​ປະ​ກອບ​ການ ແລະ ຜູ້​ຢູ່​ອາ​ໃສ ຢູ່ພາຍໃນເຂດ ສາມາດດຳເນີນການພັດທະນາໂຄງການ ຕາມແຜນການທີ່ວາງໄວ້ຢ່າງມີປະສິດທິພາບ. ພາຍຫຼັງທີ່ພັກ ແລະ ລັດຖະບານໄດ້ຂົນຂວຍດຶງດູດການລົງທຶນເຂົ້າມາແລ້ວ ແລະ ໃນປະຈຸບັນ ຂສພ ຕ່າງໆໃນນະຄອນຫຼວງຂອງພວກເຮົາ ກໍໄດ້ຮັບການພັດທະນາຢ່າງມີທ່າກ້າວກະໂດດ ມີຈໍານວນວິສາຫະກິດເພີ່ມຂຶ້ນຢ່າງຕໍ່ເນື່ອງ ແລະ ແຮງງານເຂົາມາເຮັດວຽກພາຍໃນເຂດກໍ່ມີເຖິງ 6.000 ຕໍາແໜ່ງງານແລ້ວ, ຕໍ່ກັບສະພາບການດັ່ງກ່າວມັນຫຼີກລ້ຽງບໍ່ໄດ້ທີ່ອາດຈະມີສະພາບການຫຍໍ້ທໍ້, ຂີ້ລັກງັດແອະ ຫຼື ຄວາມບໍ່ສະຫງົບຂື້ນ. ສະນັ້ນ, ກຳລັງ ປກຊ-ປສກ ແລະ ລປພ ຈຶ່ງເປັນກອງກຳລັງປະຈັນບານອັນສໍາຄັນທີ່ຈະຊ່ວຍປົກປ້ອງຊິວິດ ແລະ ຊັບສິນຂອງບັນດາບໍລິສັດ, ຜູ້ປະກອບການ ແລະ ຜູ້ຢູ່ອາໃສ ທີ່ເຂົ້າມາລົງທຶນບໍ່ໃຫ້ໄດ້ຮັບຄວາມເສຍຫາຍຈາກປະກົດການຫຍໍ້ທໍ້ຕ່າງ.

ໃນໂອກາດນີ້ລົງເຮັດວຽກກັບບັນດາເຂດເສດຖະກິດພິເສດ ທາງຄະນະຄຸ້ມຄອງເຂດ ກໍ່ໄດ້ກຳນົດທິດທາງແຜນການໃນປິຕໍ່ມາ ເພື່ອເປັນບ່ອນອີງໃນການສືບຕໍ່ຈັດຕັ້ງປະຕິບັດ ເປັນຕົ້ນແມ່ນ ສະເໜີໃຫ້ກຳລັງ ປກຊ-ປກສ ປະຈໍາເຂດ ສຶບຕໍ່ສຶກສາອົບຮົມການເມືອງແນວຄິດໃຫ້ບັນດາບໍລິສັດ, ຜູ້ປະກອບການ, ຜູ້ຢູ່ອາໃສ ລວມທັງ ພະນັກງານຮັກສາຄວາມປອດໄຟ ໄດ້ເຂົ້າໃຈເຖິງແນວທາງນະໂຍບາຍ ຂອງພັກ-ລັດໃນການພັດທະນາໂຄງການ, ເຜີຍແຜ່ຂໍ້ມູນຂ່າວສານ ປະສານສົບທົບກັບບ້ານອ້ອມຂ້າງທີ່ເຂດຕັ້ງຢູ່ ລວມເຖິງກົນໄກປະສານງານກັບກຳລັງ ປສກ, ປກຊ ຂັ້ນຕ່າງໆຕາມລະບົບສາຍຕັ້ງ, ສາຍຂວາງ ແລະ ວຽກງານປິ່ນອ້ອມອື່ນໆຕື່ມອີກ.