ໃນວັນທີ 06 ກັນຍາ 2022 ທີ່ຜ່ານມາ, ທີ່ເຂດພັດທະນາກວມລວມໄຊເຊດຖາ ນະຄອນຫຼວງວຽງຈັນ ໄດ້ຕ້ອນຮັບການເດີນທາງມາຢ້ຽມຢາມຂອງທ່ານ Gerardo Peñalver Portal, ຮອງລັດຖະມົນຕີກະຊວງການຕ່າງປະເທດ ສາທາລະນະລັດ ກູບາ ພ້ອມຄະນະ ໃນໂອກາດທີ່ທ່ານເດີນທາງມາເຮັດວຽກ ແລະ ຢ້ຽມຢາມ ສປປ ລາວ. ໂດຍການເຂົ້າຮ່ວມຕ້ອນຮັບຂອງ ຫົວໜ້າຫ້ອງການສົ່ງເສີມ ແລະ ຄຸ້ມຄອງເຂດເສດຖະກິດພິເສດ, ກະຊວງແຜນການ ແລະ ການລົງທຶນ; ຫົວໜ້າຄະນະຄຸ້ມຄອງເຂດເສດຖະກິດພິເສດ ນະຄອນຫຼວງວຽງຈັນ ພ້ອມດ້ວຍພາກສ່ວນທີ່ກ່ຽວຂ້ອງ ແລະ ຜູ້ພັດທະນາ.

ໃນໂອກາດນີ້ ທ່ານ ທະນົງໄຊ ຄຸດໄພທູນ ຫົວໜ້າຄະນະຄຸ້ມຄອງເຂດເສດຖະກິດພິເສດ ນະຄອນຫຼວງວຽງຈັນ ໄດ້ລາຍງານກ່ຽວກັບສະພາບການພັດທະນາເຂດເສດຖະກິດພິເສດ ນະຄອນຫຼວງວຽງຈັນ ໂດຍສະເພາະແມ່ນ 05 ເຂດເສດຖະກິດພິເສດ ທີ່ຂຶ້ນກັບ ຄື: ເຂດພັດທະນາກວມລວມໄຊເຊດຖາ, ເຂດເສດຖະກິດພິເສດ ບຶງທາດຫຼວງ, ເຂດເສດຖະກິດພິເສດ ລ່ອງແທ່ງ-ວຽງຈັນ, ເຂດເສດຖະກິດພິເສດ ດົງໂພສີ ແລະ ເຂດວຽງຈັນໂລຊິດສະຕິກ. ຊຶ່ງມີເນື້ອທີ່ທັງໝົດຕາມສັນຍາສຳປະທານ 2.360 ເຮັກຕາ ປັດຈຸບັນ ໄດ້ມີບໍລິສັດທີ່ເຂົ້າມາຈົດທະບຽນລົງທຶນທັງໝົດ 165 ບໍລິສັດ, ມີທຶນຈົດທະບຽນ 775 ລ້ານໂດລາສະຫະລັດ, ແລະ ມີມູນຄ່າການລົງທຶນຕົວຈິງ 2,8 ຕື້ໂດລາສະຫະລັດ, ປະຕິບັດພັນທະໃຫ້ລັດຖະບານ ໄດ້ທັງໝົດ 213 ຕື້ກີບ; ສ້າງວຽກເຮັດງານທໍາໄດ້ ມີແຮງງານ 6,173 ຄົນ, ໃນນີ້ເປັນແຮງງານລາວ 4,915 ຄົນ ການສົ່ງອອກມີມູນຄ່າ ປະມານ 191 ລ້ານໂດລາສະຫະລັດ. ຊຶ່ງປະກອບດ້ວຍຜະລິດຕະພັນ ເຄື່ອງເອເລັກໂຕຣນິກ, ເຄື່ອງນຸ່ງຫົ່ມ, ອຸປະກອນການແພດ, ຢາປົວພະຍາດ, ຜະລິດຕະພັນດອກໄຟ, ຫົວອາຫານສັດ, ນ້ຳມັນເຊື້ອໄຟ, ຜະລິດຕະພັນອາຫານ, ເຄື່ອງດື່ມ ແລະ ອື່ນໆ.
ນອກຈາກນີ້ ທ່ານ ທະນົງໄຊ ຄຸດໄພທູນ ຍັງໄດ້ນໍາສະເໜີກ່ຽວກັບນະໂຍບາຍສົ່ງເສີມ ທີ່ລັດຖະບານ ສປປ ລາວ ມີຕໍ່ໂຄງການພັດທະນາເຂດເສດຖະກິດພິເສດ ຊຶ່ງໄດ້ລະບຸແຈ້ງໃນ ກົດໝາຍວ່າດ້ວຍການສົ່ງເສີມການລົງທຶນ, ດໍາລັດວ່າດ້ວຍເຂດເສດຖະກິດກິດພິເສດ ແລະ ສັນຍາພັດທະນາໂຄງການ ເພື່ອເຮັດການພັດທະນາເຂດເສດຖະກິດພິເສດ ເປັນຈຸດສຸມການພັດທະນາ ແລະ ສາມາດເຊື່ອມໂຍງສາຍການຜະລິດເຂົ້າກັບພາກພື້ນ ແລະ ສາກົນ.

ໃນໂອກາດດຽວກັນນີ້ ຄະນະຜູ້ແທນ ສາທາລະນະລັດ ກຸບາ ຍັງໄດ້ຮັບຟັງການອະທິບາຍແຜນ ຜັງລວມຂອງການພັດທະນາໂຄງການ, ແລກປ່ຽນສົນທະນາບັນດາຂໍ້ມູນການລົງທຶນ ແລະ ໄດ້ລົງຢ້ຽມຊົມເບິ່ງການພັດທະນາຕົວຈິງຂອງບັນດາໂຮງຈັກໂຮງງານພາຍໃນເຂດພັດທະນາກວມລວມໄຊເຊດຖາ ເພື່ອນໍາເປັນຂໍ້ມູນໃຫ້ແກ່ການດຶງດູດເອົາການລົງທຶນຕື່ມອີກ.