ໃນຕອນເຊົ້າວັນທີ 14 ກັນຍາ 2022 ທີ່ຜ່ານມາ, ທີ່ຫ້ອງວ່າການປົກຄອງແຂວງອຸດົມໄຊ ໄດ້ມີພິທີມອບ-ຮັບເຄື່ອງອຸປະກອນກິລາ, ຊຸດກິລາ ພ້ອມອຸປະກອນການຮຽນ ໃຫ້ແກ່ໂຮງຮຽນຢູ່ເຂດຫາງໄກສອກຫຼີກຂອງແຂວງອຸດົມໄຊ ລວມມູນຄ້າ 516.000.000 ກີບ ໂດຍການກ່າວມອບຂອງທ່ານ ນາງ ຫວງ ຊີວເຫວີນ (Huang XiuWen), ຮອງປະທານ ບໍລິສັດ ລາວທາດຫຼວງ ລົງທຶນພັດທະນາ ຈໍາກັດ, ຜູ້ພັດທະນາເຂດເສດຖະກິດພິເສດ ບຶງທາດຫຼວງ ນະຄອນວຽງຈັນ ແລະ ກ່າວຮັບໂດຍທ່ານ ທ່ານ ອ່ອນແກ້ວ ອຸ່ນອາລົມ, ຮອງເຈົ້າແຂວງແຂວງອຸດົມໄຊ. ໂດຍການເຂົ້າຮ່ວມເປັນສັກຂີພະຍານຂອງທ່ານ ນາງ ຄໍາຈັນ ວົງແສນບູນ, ຮອງລັດຖະມົນຕີກະຊວງແຜນການ ແລະ ການລົງທຶນ, ທ່ານ ສອນປະເສີດ ດາລາວົງ, ຫົວໜ້າຫ້ອງການສົ່ງເສີມ ແລະ ຄຸ້ມຄອງເຂດເສດຖະກິດພິເສດ ແລະ ທ່ານ ທະນົງໄຊ ຄຸດໄພທູນ ຫົວໜ້າຄະນະຄຸ້ມຄອງເຂດເສດຖະກິດພິເສດ ນະຄອນຫຼວງວຽງຈັນ ພ້ອມບັນດາພາກສ່ວນທີ່ກ່ຽວຂ້ອງຈາກສູນກາງ ແລະ ທ້ອງຖິ່ນເຂົ້າຮ່ວມ.

ໃນໂອກາດນີ້ທ່ານຮອງເຈົ້າແຂວງອຸດົມໄຊ ໄດ້ຕາງໃຫ້ອຳນາດການປົກຄອງ ແລະ ປະຊາຊົນ ແຂວງອຸດົມໄຊ ສະແດງຄວາມຂອບໃຈເປັນຢ່າງສູງ ບັນດາພາກສ່ວນຕ່າງ ໂດຍສະເພາະແມ່ນ ຜູ້ພັດທະນາ ເຂດເສດຖະກິດພິເສດ ບຶງທາດຫຼວງ ນະຄອນຫຼວງວຽງຈັນ ທີ່ໄດ້ປະກອບສ່ວນວັດຖຸປັດໄຈ ເຂົ້າໃນການຊ່ວຍເຫຼືອປະຊາຊົນໃນເຂດຮ່າງໄກສອກຫຼີກ ກໍ່ຄືການປະກອບສ່ວນເຂົ້າໃນການຟື້ນຟູແຂວງອຸດົມໄຊ ພາຍຫຼັງທີ່ໄດ້ຮັບຜົນກະທົບຈາກໄພພິບັດນໍ້າຖ້ວມໃນໄລຍະທີ່ຜ່ານ.