ໃນຕອນບ່າຍຂອງວັນທີ 21 ກັນຍາ 2022 ທີ່ຜ່ານມາ, ສະຫະພັນແມ່ຍິງ ນະຄອນຫຼວງວຽງຈັນ ຮ່ວມກັບອົງການ UNFPA ໄດ້ລົງເຜີຍແຜ່ຂໍ້ມູນຂ່າວສານ ແລະ ການບໍລິການກວດສຸກຂະພາບທີ່ເປັນມິດປິດລັບ ໃຫ້ແກ່ໄວໜຸ່ມ ທີ່ອອກແຮງງານພາຍໃນເຂດພັດທະນາກວມລວມໄຊເຊດຖາ ນະຄອນຫຼວງວຽງຈັນ ໂດຍສະເພາະແມ່ນແຮງງານໜຸ່ມສາວ ເພື່ອໃຫ້ຮັບຮູ້ເຂົ້າໃຈຢ່າງຖືກຕ້ອງຕໍ່ຄວາມສໍາຄັນໃນການກວດກາສຸກຂະພາບໃນໄວຈະເລີນພັນ ລວມເຖິງການເຂົ້າເຖິງການບໍລິການກວກາສຸກຂະພາບຕ່າງໆທີ່ທາງເຈົ້າໜ້າທີ່ສາທາລະນະສຸກໃຫ້ຄວາມສໍາຄັນຕໍ່ການປິດລັບຂໍ້ມູນສ່ວນບຸກຄົນ ເນື່ອງຈາກໄລຍະຜ່ານມາແຮງງານຊາວໜຸ່ມສາວສ່ວນໃຫຍ່ຍັງມີລັກສະນະເຂີນອາຍ ແລະ ບໍ່ກ້າເຂົ້າໄປຫາຈຸດກວດຕ່າງໆ.

ເຂົ້າຮ່ວມການລົງເຄື່ອນໄຫວໃນຄັ້ງນີ້ມີທ່ານ ນາງ ຫຼຽນຄຳ ວິລະພັນ ປະທານ ສະຫະພັນແມ່ຍິງ ນະຄອນຫຼວງວຽງຈັນ, ທ່ານ ນາງ ມາຣຽມ ເອຄານ ຜູ້ຕາງໜ້າ ຈາກອົງການ UNFPA, ໂດຍການໃຫ້ກຽດຕອນຮັບທ່ານ ທະນົງໄຊ ຄຸດໄພທູນ, ຫົວໜ້າຄະນະຄຸ້ມຄອງເຂດເສດຖະກິດພິເສດ ນະຄອນຫຼວງວຽງຈັນ, ຕາງໜ້າບໍລິສັດຜູ້ພັດທະນາ ພ້ອມດ້ວຍພະນັກງານຫຼັກແຫຼ່ງຂອງທັງສອງຝ່າຍເຂົ້າຮ່ວມ.

ໃນໂອກາດນີ້ ທ່ານ ທະນົງໄຊ ຄຸດໄພທູນ ໄດ້ລາຍງານ ໂດຍສັງເຂບກ່ຽວກັບສະພາບການຄຸ້ມຄອງບໍລິຫານ ແລະ ພັດທະນາ 05 ເຂດເສດຖະກິດພິເສດ ນະຄອນຫຼວງວຽງຈັນ ຊຶ່ງປັດຈຸບັນ ໄດ້ມີບໍລິສັດທີ່ເຂົ້າມາຈົດທະບຽນລົງທຶນທັງໝົດ 168 ບໍລິສັດ, ມີທຶນຈົດທະບຽນ 775 ລ້ານໂດລາສະຫະລັດ, ແຜນລົງທຶນທັງໝົດປະມານ 4,1 ຕື້ໂດລາສະຫະລັດ ແລະ ມີມູນຄ່າການລົງທຶນຕົວຈິງ 2,8 ຕື້ໂດລາສະຫະລັດ, ປະຕິບັດພັນທະໃຫ້ແກ່ລັດຖະບານໄດ້ທັງໝົດ 227 ຕື້ກີບ; ສ້າງວຽກເຮັດງານທໍາໄດ້ ມີແຮງງານ 6,173 ຄົນ, ແຮງງານ ລາວ 4,915 ຄົນ ແລະ ແຮງງານຕ່າງປະເທດ 1,258 ຄົນ; ການນຳເຂົ້າ-ສົ່ງອອກ ການສົ່ງອອກມີມູນຄ່າ 3,7 ຕື້ໂດລາສະຫະລັດ. ເວົ້າສະເພາະເຂດພັດທະນາກວມລວມໄຊເຊດຖາ ມີຈໍານວນ 103 ບໍລິສັດ, ມີທຶນຈົດທະບຽນ 408 ລ້ານໂດລາສະຫະລັດ, ແຜນການລົງທຶນ 2,2 ຕື້ໂດລາສະຫະລັດ. ມີມູນການລົງທຶນຕົວຈິງພາຍໃນເຂດ 2,1 ຕື້ໂດລາສະຫະລັດ. ສາມາດປະຕິບັດພັນທະເຂົ້າງົບປະມານຂອງລັດໄດ້ທັງໝົດ 177 ຕື້ກີບ.
ແຮງງານພາຍໃນເຂດກວມລວມໄຊເຊດຖາ ມີທັງໝົດ 5,112 ຄົນ, ແຮງງານລາວ 3,948 ຄົນ, ແຮງງານຕ່າງປະເທດ 1,164 ຄົນ. (ມີບໍລິສັດທີ່ເຄື່ອນໄຫວມີແຮງງານທັງໝົດ 32 ບໍລິສັດ), ຊຶ່ງສ່ວນຫຼາຍແມ່ນມີປະກັນສັງຄົມໃຫ້ແກ່ແຮງງານລາວພາຍໃນບໍລິສັດ. ນອກຈາກນີ້, ຄຂສພ.ນວ ຍັງໄດ້ຮ່ວມມືກັບສູນກວດສຸຂະພາບໂຮງໝໍມະໂຫສົດ ໃນການກວດສຸຂະພາບຂອງແຮງງານເປັນປະຈໍາ.