ໃນຕອນບ່າຍຂອງວັນທີ 15 ຕຸລາ 2022, ທ່ານ ພົນເອກ ນຽງ ພາດ ຮອງລັດຖະມົນຕີ ຜູ້ປະຈຳການກະຊວງປ້ອງກັນປະເທດ ແຫ່ງຣາຊອານາຈັກ ກໍາປູເຈຍ ພ້ອມຄະນະ ໄດ້ເດີນທາງມາຢ້ຽມຢາມເຂດພັດທະນາກວມລວມໄຊເຊດຖາ ນະຄອນຫຼວງວຽງຈັນ, ໂດຍການນໍາພາຂອງທ່ານ ປະເດີມພອນ ສົນທະນີ ຮອງລັດຖະມົນຕີ ກະຊວງແຮງງານ ແລະ ສະຫວັດດີການສັງຄົມ ທັງເປັນປະທານສະມາຄົມມິດຕະພາບລາວ - ກໍາປູເຈຍ, ເຂົ້າຮ່ວມຕ້ອນຮັບມີຫ້ອງການສົ່ງເສີມ ແລະ ຄຸ້ມຄອງເຂດເສດຖະກິດພິເສດ, ກະຊວງແຜນການ ແລະ ການລົງທຶນ; ຄະນະຄຸ້ມຄອງເຂດເສດຖະກິດພິເສດ ນະຄອນຫຼວງວຽງຈັນ, ຫ້ອງວ່າການນະຄອນຫຼວງວຽງຈັນ; ບໍລິສັດ ຮ່ວມທຶນລາວ-ຈີນ ຈໍາກັດ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.

ໃນໂອກາດນີ້ ທ່ານ ທະນົງໄຊ ຄຸດໄພທູນ ຫົວຫນ້າຄະນະຄຸ້ມຄອງເຂດເສດຖະກິດພິເສດ ນະຄອນຫຼວງວຽງຈັນ ໄດ້ລາຍງານ ໂດຍສັງເຂບກ່ຽວກັບສະພາບການຄຸ້ມຄອງບໍລິຫານ ແລະ ພັດທະນາເຂດເສດຖະກິດພິເສດ ນະຄອນຫຼວງວຽງຈັນ ຈໍານວນ 05 ແຫ່ງຄື: ເຂດພັດທະນາກວມລວມໄຊເຊດຖາ, ເຂດເສດຖະກິດພິເສດ ບຶງທາດຫຼວງ, ເຂດເສດຖະກິດພິເສດ ລ່ອງແທ່ງ-ວຽງຈັນ, ເຂດເສດຖະກິດພິເສດ ດົງໂພສີ ແລະ ເຂດໂລຊິດສະຕິກ ນະຄອນຫຼວງວຽງຈັນ.

ເວົ້າສະເພາະເຂດພັດທະນາກວມລວມໄຊເຊດຖາ ປັດຈຸບັນມີບໍລິສັດ ເຂົ້າມາລົງທຶນ ຈໍານວນ 105 ບໍລິສັດ, ມີທຶນຈົດທະບຽນ 400 ລ້ານໂດລາສະຫະລັດ, ແຜນການລົງທຶນ 2,2 ຕື້ໂດລາສະຫະລັດ ມີແຮງງານພາຍໃນເຂດ ທັງຫມົດ 3.948 ຄົນ (ໃນນີ້ເປັນແຮງງານລາວ 3.748 ຄົນ), ມີມູນການລົງທຶນຕົວຈິງພາຍໃນເຂດ 2,1 ຕື້ໂດລາສະຫະລັດ ໄດ້ມີບໍລິສັດທີ່ມີຊື່ສຽງເຂົ້າມາລົງທຶນເປັນຈໍານວນຫຼາຍເຊັ່ນ: ບໍລິສັດ ໂຮຢາລາວ ຈໍາກັດ ຈາກປະເທດ ຢີປຸ່ນ ທີ່ເປັນໂຮງງານຜະລິດເຈນແວ່ນຕາ ແລະ ແຜນຣາດດິດເພື່ອສົ່ງອອກ, ບໍລິສັດ ຜະລິດຢາ ໂກເດັນວິດສະດອມ(ລາວ) ຈໍາກັດ ຈາກ ສປ ຈີນ ເຂົ້າມາຕັ້ງໂຮງງານເພື່ອວິໃຈ, ພັດທະນາ, ຜະລິດ, ຈໍາຫນ່າຍຜະລິດຕະພັນຢາ ແລະ ຜະລິດຕະພັນເສີມສຸກຂະພາບທີ່ກໍາລັງດໍາເນີນການກໍ່ສ້າງ, ບໍລິສັດ ເປໂຕ ເຄມີລາວ ຈໍາກັດ ເປັນໂຮງງານກັ່ນນ້ໍາມັນ ແລະ ຜະລິດນ້ໍາມັນເຄື່ອງເພື່ອສະຫນອງໃຫ້ແກ່ພາຍໃນ ແລະ ຕ່າງປະເທດ, ບໍລິສັດ ຄວາມຫວັງໃຫມ່ ຈໍາກັດ ຜະລິດຫົວອາຫານສັດ, ບໍລິສັດ ຕັດຫຍິບເປເຕີ ຈໍາກັດ ແລະ ອື່ນໆ. ຊຶ່ງມາຮອດ ເດືອນກັນຍາ 2022 ເຂດພັດທະນາກວມລວມໄຊເຊດຖາ ສາມາດປະຕິບັດພັນທະເຂົ້າງົບປະມານ ຂອງລັດໄດ້ທັງຫມົດ 179 ຕື້ກີບ (ພາສີຂາເຂົ້າ, ອາກອນຕ່າງໆ ແລະ ຄ່າທໍານຽມຄ່າບໍລິການ); ການສົ່ງອອກມີມູນຄ່າ 287 ລ້ານໂດລາສະຫະລັດ. ສິນຄ້າສົ່ງອອກສ່ວນໃຫຍ່ແມ່ນ ອຸປະກອນຊິ້ນສ່ວນເອເລັກໂຕຣນິກ, ເຄື່ອງນຸ່ງຫົ່ມ, ອຸປະກອນການແພດ , ຢາປົວພະຍາດ, ອຸປະກອນແສງສະຫວ່າງ, ຫົວອາຫານສັດ, ນ້ໍາມັນເຊື້ອໄຟ, ອາຫານສໍາເລັດຮູບ ຜະລິດຕະພັນຊີ້ນງົວ ແລະ ອື່ນໆ.

ໃນໂອກາດນີ້ ຄະນະຜູ້ແທນຣາຊອານາຈັກ ກຳປູເຈຍ ຍັງໄດ້ລົງເບິ່ງບັນດາພື້ນຖານໂຄງລ່າງ ແລະ ໂຮງຈັກໂຮງງານທີ່ດຳເນີນກິດຈະການຢູ່ພາຍໃນເຂດພັດທະນາກວມລວມໄຊເຊດຖາ ຕື່ມອີກດ້ວຍ.