ໃນຕອນເຊົ້າຂອງວັນທີ 17 ຕຸລາ 2022 ນັກສຳມະນາກອນ ຊຸດຝຶກອົບຮົມບຳລຸງທິດສະດີການເມືອງການ-ປົກຄອງ ໄລຍະ 45 ວັນ ຊຸດທີ VII ຂອງຫ້ອງວ່າການສຳນັກງານນາຍົກລັດຖະມົນຕີ ໄດ້ເດີນທາງມາຢຽມຢາມເຂດພັດທະນາກວມລວມໄຊເຊດຖາ ນະຄອນຫຼວງວຽງຈັນ ໂດຍການນໍາພາຄະນຂອງ ທ່ານ ຖາວອນ ຈັນທະລາ ຮອງຫົວໜ້າກົມຈັດຕັ້ງ ແລະ ພະນັກງານ ແລະ ເຂົ້າຮ່ວມຕ້ອນຮັບຂອງ ທ່ານ ທະນົງໄຊ ຄຸດໄພທູນ, ຫົວໜ້າຄະນະຄຸ້ມຄອງເຂດເສດຖະກິດພິເສດ ນະຄອນຫຼວງວຽງຈັນ, ມີຜູ້ຕາງໜ້າຈາກບໍລິສັດ ຮ່ວມທຶນລາວ-ຈີນ ຈໍາກັດ ແລະ ພະນັກງານຫຼັກແຫຼ່ງເຂົ້າຮ່ວມ.

ຈຸດປະສົງຂອງການລົງຢ້ຽມຢາມຄັ້ງນີ້ ກໍ່ເພື່ອເປັນການຮຽນຮູ້ສະພາບການພັດທະນາຕົວຈິງຂອງເສດຖະກິດ-ສັງຄົມ ຂອງ ສປປ ລາວ ພາຍຫຼັງທີ່ບັນດານັກຝຶກອົມຮົມ ໄດ້ຮຽນຮູ້ທາງດ້ານທິດສະເດີ ແລະ ຫຼັກການຕ່າງໆຂອງພັກ ຊຶ່ງເຂດເສດຖະກິດພິເສດ ກໍ່ແມ່ນໜຶ່ງໃນໝາກຜົນຂອງການຜັນຂະຫຍາຍແນວທາງການປ່ຽນແປງໃໝ່ຮອບດ້ານທີ່ມີຫຼັກການຂອງພັກ ພາຍຫຼັງທີ່ ສປປ ລາວ ໄດ້ລິເລີ່ມເປີດປະເທດເພື່ອຮ່ວມ ແລະ ດຶງດູດການລົງທຶນຈາກຕ່າງປະເທດ.

ໃນໂອກາດນີ້ ທ່ານ ທະນົງໄຊ ຄຸດໄພທູນ ໄດ້ຍົກໃຫ້ເຫັນບາງຜົນສໍາເລັດ ໂດຍສະເພາະແມ່ນຢູ່ໃນໂຄງການພັດທະນາເຂດເສດຖະກິດພິເສດ 5 ແຫ່ງຂອງນະຄອນຫຼວງວຽງຈັນ ຊຶ່ງມາເຖິງປະຈຸບັນ ໄດ້ມີບໍລິສັດທີ່ເຂົ້າມາຈົດທະບຽນລົງທຶນທັງໝົດ 168 ບໍລິສັດ, ມີທຶນຈົດທະບຽນ 775 ລ້ານໂດລາສະຫະລັດ, ແຜນລົງທຶນທັງໝົດປະມານ 4,1 ຕື້ໂດລາສະຫະລັດ ແລະ ມີມູນຄ່າການລົງທຶນຕົວຈິງ 2,8 ຕື້ໂດລາສະຫະລັດ, ປະຕິບັດພັນທະໃຫ້ແກ່ລັດຖະບານໄດ້ທັງໝົດ 222 ຕື້ກີບ; ສ້າງວຽກເຮັດງານທໍາໄດ້ 6,238 ຄົນ ເປັນແຮງງານລາວ 4,978 ຄົນ ມີການສົ່ງອອກສິນຄ້າໄປຕ່າງປະເທດ ມູນຄ່າ 240 ກວ່າລ້ານໂດລາສະຫະລັດ. ສໍາລັບເຂດພັດທະນາກວມລວມໄຊເຊດຖາ ທີ່ຖືກສ້າງຕັ້ງຂຶ້ນໃນປີ 2010 ເປັນເຂດຫນຶ່ງ ໃນຈໍານວນ 5 ເຂດ ທີ່ມີການພັດທະນາຢ່າງພົ້ນເດັ່ນ ມີບໍລິສັດເຂົ້າມາລົງທຶນ ຈໍານວນ 105 ບໍລິສັດ, ມີທຶນຈົດທະບຽນ 400 ລ້ານໂດລາສະຫະລັດ, ແຜນການລົງທຶນ 2,2 ຕື້ໂດລາສະຫະລັດ ມີແຮງງານພາຍໃນເຂດ ທັງຫມົດ 3.948 ຄົນ, ເປັນແຮງງານລາວ 3.748 ຄົນ, ມີມູນການລົງທຶນຕົວຈິງພາຍໃນເຂດ 2,1 ຕື້ໂດລາສະຫະລັດ ໄດ້ມີບໍລິສັດທີ່ມີຊື່ສຽງເຂົ້າມາລົງທຶນເປັນຈໍານວນຫຼາຍເຊັ່ນ: ບໍລິສັດ ໂຮຢາລາວ ຈໍາກັດ ຈາກປະເທດຢີປຸ່ນ ທີ່ຜະລິດເຈນແວ່ນຕາ ແລະ ແຜນຮາດດິດເພື່ອສົ່ງອອກ, ບໍລິສັດ ຜະລິດຢາ ໂກເດັນວິດສະດອມ (ລາວ) ຈໍາກັດ, ບໍລິສັດ ເປໂຕ ເຄມີລາວ ຈໍາກັດ ເປັນໂຮງງານກັ່ນນ້ໍາມັນ ແລະ ຜະລິດນ້ໍາມັນເຄື່ອງເພື່ອສະຫນອງໃຫ້ແກ່ພາຍໃນ ແລະ ຕ່າງປະເທດ.

ພາຍຫຼັງຮັບການອະທິບາຍໂດຍສັງເຂດກ່ຽວກັບໂຄງການແລ້ວ ຄະນະນັກສຳມະນາກອນ ຊຸດຝຶກອົບຮົມບຳລຸງທິດສະດີການເມືອງການ-ປົກຄອງ ໄລຍະ 45 ວັນ ຊຸດທີ VII ກໍ່ຍັງໄດ້ລົງເບິ່ງບັນດາໂຮງຈັກໂຮງງານທີ່ດຳເນີນກິດຈະການຢູ່ພາຍໃນເຂດພັດທະນາກວມລວມໄຊເຊດຖາ ອີກດ້ວຍ