ໃນວັນທີ 21 ຕຸລາ 2022 ທີ່ຜ່ານມາ ຄະນະຄຸ້ມຄອງເຂດເສດຖະກິດພິເສດ ນະຄອນຫຼວງວຽງຈັນ ໄດ້ຈັດພິທີປະກາດນາມມະຍົດໜ່ວຍພັກ ປອດໃສ ເຂັ້ມແຂງ ໜັ້ນແໜ້ນ ປະຈໍາປີ 2021 ຂອງໜ່ວຍພັກຂອງຕົນຂຶ້ນ ພາຍໃຕ້ການເປັນປະທານຂອງ ສຫ ທະນົງໄຊ ຄຸດໄພທູນ, ເລຂາໜ່ວຍພັກ, ຫົວໜ້າ ຄະນະຄຸ້ມຄອງເຂດເສດຖະກິດພິເສດ ນະຄອນຫຼວງວຽງຈັນ ໂດຍມີສະມາຊິກພັກ, ຕ່າງຫນ້າຄະນະຈັດຕັ້ງ ນວ, ຄະນະກວດກາ ນວ, ຫ້ອງການສົ່ງເສີມ ແລະ ຄຸ້ມຄອງ ຂສພ, ພະນັກງານຫຼັກແຫຼ່ງຂອງ ຄຂພສ ນະຄອນຫຼວງວຽງຈັນ ເຂົ້າຮ່ວມຢ່າງພ້ອມພຽງ.

ໃນພິທີ ສຫ ທະນົງໄຊ ຄຸດໄພທູນ ໄດ້ມີຄໍາເຫັນໂອ້ລົມບາງຕອນວ່າ ພາຍໃຕ້ຄວາມເອົາໃຈໃສ່ຕໍ່ການຊີ້ນໍາ-ນໍາພາ ຢ່າງໃກ້ສິດຕິດແທດ ກໍ່ຄືການຜັນຂະຫຍາຍມະຕິຄໍາສັ່ງຕ່າງໆຂອງຂັ້ນເທິງ ໜ່ວຍພັກ ຄະນະຄຸ້ມຄອງເຂດເສດຖະກິດພິເສດ ນະຄອນຫຼວງວຽງຈັນ ພວກເຮົາ ສາມາດຍາດໄດ້ຜົນງານພົ້ນເດັ່ນຫຼາຍດ້ານ ໃນການຊີ້ນໍາ-ນໍາພາ ວຽກງານການພັດທະນາ ຂສພ ຢູ່ ນະຄອນຫຼວງວຽງຈັນ ໂດຍສະເພາະແມ່ນການອອກເຫື່ອເທແຮງ, ຄວາມເປັນແບບຢ່າງ ແລະ ສາມາຄີໜັກແໜ້ນຂອງສະມາຊິກພັກພະນັກງານທຸກສະຫາຍ, ມັນໄດ້ສະທ້ອນໂດຍກົງຕໍ່ການເຄື່ອນໄຫວວຽກງານວິຊາສະເພາະຂອງ ຄະນະຄຸ້ມຄອງເຂດເສດຖະກິດພິເສດ ນະຄອນຫຼວງວຽງຈັນ (ຄຂສພ.ນວ) ໃນການປະກອບສ່ວນເຂົ້າໃນການພັດທະນາເສດຖະກິດ-ສັງຄົມ ໂດຍສະເພາະແມ່ນການສ້າງວຽກເຮັດງານທໍາໄດ້ຫຼາຍກວ່າ 6,000 ຕໍາແໜງງານ, ການສ້າງລາຍຮັບເຂົ້າງົບປະມານແຫ່ງລັດໄດ້ ຫຼາຍກວ່າ 200 ຕື້ກີບ ແລະ ອື່ນໆ. ດ້ວຍຜົນງານທີ່ພົ້ນເດັ່ນດັ່ງກ່າວ, ອົງຄະນະພັກ ນະຄອນຫຼວງວຽງຈັນ ຈຶ່ງເຫັນດີມອບ ນາມມະຍົດໜ່ວຍພັກ ປອດໃສ ເຂັ້ມແຂງ ໜັ້ນແໜ້ນ ປະຈໍາປີ 2021 ໃຫ້ແກ່ ໜ່ວຍພັກ ຄຂສພ.ນວ.

ສຫ ເລຂາຫນ່ວຍພັກ ຍັງເໜັ້ນໜັກຕື່ມອີກວ່າ ເພື່ອເປັນການຮັກສາມູນເຊື້ອ ແລະ ນາມະຍົດອັນມີກຽດສະຫງ່ານີ້ ຂໍໃຫ້ສະມາຊິກພັກ ພະນັກງານພາຍໃນ ຄຂສພ.ນວ ຈົ່ງໄດ້ສືບຕໍ່ເສີມຂະຫຍາຍຄວາມສາມັກຄີ, ສຸມເຫື່ອເທແຮງເຂົ້າໃນວຽກງານວິຊາສະເພາະຂອງຕົນຢ່າງເປັນເຈົ້າການ ໄປຄຽງຄູ່ກັບການສຶກສາຄົ້ນຄວ້າຮໍ່າຮຽນບັນດາລະບຽບການຂອງພັກ ແລະ ນິຕິກຳຂອງລັດທີ່ວາງອອກແຕ່ລະໄລຍະ ເພື່ອຕີຖອຍທຸກປະກົດການຫຍໍ້ທໍ້ ແລະ ສ້າງຜົນສໍາເລັດໃໝ່ໃຫຍ່ຫຼວງກວ່າເກົ່າ.

ນອກຈາກພິທີປະກາດນາມມະຍົດໜ່ວຍພັກ ປອດໃສເຂັ້ມແຂງ ໜັ້ນແໜ້ນ ແລ້ວ ໜ່ວຍພັກ ຄຂສພ.ນວ ຍັງໄດ້ມີພິທີຮັບເອົາມະຫາຊົນກ້າວໜ້າ ຈໍານວນ 02 ສະຫາຍເຂົ້າເປັນສະມາຊິກພັກສະໄຫມສໍາຮອງຂອງໜ່ວຍພັກ ແລະ ມອບໃບຍ້ອງຍໍໃຫ້ແກ່ພະນັກງານລັດຖະກອນພາຍໃນ ຄຂສພ.ນວ.