ວັນທີ 17 ພະຈິກ 2022 ທີ່ຫ້ອງການຄະນະຄຸ້ມຄອງເຂດເສດຖະກິດພິເສດ ນະຄອນຫຼວງວຽງຈັນ ໄດ້ຈັດກອງປະຊຸມທົບທວນ ແລະ ປະເມີນຄືນການນໍາໃຊ້ລະບົບຄຸ້ມຄອງ ຫ້ອງການທັນສະໄໝ (E-Office) ຂອງພະນັກງານພາຍໃນ ຄະນະຄຸ້ມຄອງເຂດເສດຖະກິດພິເສດ ນະຄອນຫຼວງວຽງຈັນ ໂດຍການເປັນປະທ່ານຮ່ວມຂອງທ່ານ ທະນົງໄຊ ຄຸດໄພທຸນ ຫົວໜ້າຄະນະຄຸ້ມຄອງເຂດເສດຖະກິດພິເສດ ນະຄອນຫຼວງວຽງຈັນ ແລະ ທ່ານ ປອ ສົມໄພວັນ ແສງສຸຣິຍະ ຮອງຫົວໜ້າສູນບໍລິຫານລັດດິຈິຕ໋ອນ, ກະຊວງ ເຕັກໂນໂລຊີ ແລະ ການສື່ສານ ໂດຍມີຜູ້ເຂົ້າຮ່ວມທັງໝົດ 21 ທ່ານ.

        ຈຸດປະສົງຂອງກອງປະຊຸມ ເພື່ອເປັນການທົບທວນບາງບົດຮຽນໃນການນໍາໃຊ້ລະບົບ ພາຍຫຼັງທີ່ໄດ້ຮັບການຝຶກອົບຮົມຈາກສູນບໍລິຫານລັດດິຈິຕ໋ອນ, ກະຊວງເຕັກໂນໂລຊີ ແລະ ການສື່ສານ ຄັ້ງວັນທີ 30 ມີນາ ຫາ 03 ເມສາ 2022 ຢູ່ທີ່ແຂວງຫຼວງພະບາງ ໄລຍະຜ່ານມາ, ພ້ອມທັງເປັນການປະເມີນຄືນລະບົບ ແລະ ການນໍາໃຊ້ຕົວຈິງຂອງພະນັກງານ ຄຂສພ.ນວ ໃຫ້ມີຄວາມສະດວກ, ແທດເໝາະກັບການຈັດຕັ້ງປະຕິບັດຕົວຈິງໃນວຽກງານ.

       ໃນໂອກາດນີ້ ທ່ານ ທະນົງໄຊ ຄຸດໄພທູນ ໄດ້ຍົກໃຫ້ເຫັນຄວາມໝາຍຄວາມສໍາຄັນຂອງການນໍາໃຊ້ລະບົບເອເລກໂຕນິກເຂົ້າໃນວຽກງານການບໍລິຫານ-ຄຸ້ມຄອງເຂດເສດຖະກິດພິເສດທັງ 5 ເຂດຂອງນະຄອນຫຼວງວຽງຈັນ ຊຶ່ງມາເຖິງປັດຈຸບັນ ໄດ້ມີບໍລິສັດທີ່ເຂົ້າມາຈົດທະບຽນລົງທຶນທັງໝົດ 175 ບໍລິສັດ, ມີທຶນຈົດທະບຽນ 888 ລ້ານໂດລາສະຫະລັດ, ແຜນການລົງທຶນປະມານ 5.7 ຕື້ໂດລາສະຫະລັດ ແລະ ມີມູນຄ່າການລົງທຶນຕົວຈິງ 2,8 ຕື້ໂດລາສະຫະລັດ, ປະຕິບັດພັນທະໃຫ້ແກ່ລັດຖະບານໄດ້ທັງໝົດ 224 ຕື້ກີບ; ສ້າງວຽກເຮັດງານທໍາໄດ້ 6,641 ຄົນ, ສົ່ງອອກສິນຄ້າໄປຕ່າງປະເທດ ມູນຄ່າ 240 ລ້ານໂດລາສະຫະລັດ. ສໍາລັບເຂດພັດທະນາກວມລວມໄຊເຊດຖາ ທີ່ຖືກສ້າງຕັ້ງຂຶ້ນໃນປີ 2010 ເປັນເຂດຫນຶ່ງ ໃນຈໍານວນ 5 ເຂດ ທີ່ມີໜ່ວຍງານບໍລິການການລົງທຶນປະຕູດຽວປະຈໍາເຂດ ເພື່ອຮັບເອກະສານການລົງທຶນຕ່າງໆ ອໍານວຍຄວາມສະດວກໃຫ້ແກ່ນັກລົງທຶນພາຍໃນເຂດ, ຊຶ່ງປັດຈຸບັນໄດ້ມີບໍລິສັດເຂົ້າມາລົງທຶນ ຈໍານວນ 105 ບໍລິສັດ, ມີທຶນຈົດທະບຽນ 400 ລ້ານໂດລາສະຫະລັດ, ແຜນການລົງທຶນ 2.2 ຕື້ໂດລາສະຫະລັດ ມີແຮງງານພາຍໃນເຂດທັງຫມົດ 5,614 ຄົນ, ມີມູນການລົງທຶນຕົວຈິງພາຍໃນເຂດ 2.1 ຕື້ໂດລາສະຫະລັດ ໄດ້ມີບໍລິສັດທີ່ມີຊື່ສຽງເຂົ້າມາລົງທຶນເປັນຈໍານວນຫຼາຍເຊັ່ນ: ບໍລິສັດ ໂຮຢາລາວ ຈໍາກັດ ຈາກປະເທດຢີປຸ່ນ, ບໍລິສັດ ຜະລິດຢາ ໂກເດັນວິດສະດອມ (ລາວ) ຈໍາກັດ ຈາກຣົງກົ່ງ, ສປຈີນ, ບໍລິສັດ ເປໂຕ ເຄມີລາວ ຈໍາກັດ ເປັນໂຮງງານກັ່ນນ້ໍາມັນ ເພື່ອສະຫນອງໃຫ້ແກ່ພາຍໃນ ແໜ່ງທໍາອິດ.

        ພາຍຫຼັງສຳເລັດກອງປະຊຸມທົບທວນ ແລະ ປະເມີນຄືນລະຫວ່າງ ຄຂສພ.ນວ ແລະ ສູນບໍລິຫານລັດດິຈິຕ໋ອນ ທັງສອງພາກສ່ວນກໍ່ໄດ້ມີການຈັດກິດຈະກໍາ (ເຕະບານຊາຍ)  ເພື່ອສ້າງຄວາມສາມັກຄີລະຫວ່າງກັນຂື້ນ ໃຫ້ມີຄວາມແໜ້ນແຟ້ນ ແລະ ແລກປ່ຽນວຽກງານກັນເປັນປົກກະຕິ ເຮັດໃຫ້ວຽກງານມີການພັດທະນາ ຍິ່ງໆຂື້ນ ປະກອບສ່ວນເຂົ້າໃນການພັດທະນາເສດຖະກິດ-ສັງຄົມ ຂອງຊາດຕາມພາລະບົດບາດຂອງສອງພາກສ່ວນ.