ຄະນະຄຸ້ມຄອງເຂດເສດຖະກິດພິເສດ ນະຄອນຫຼວງວຽງຈັນ (ຄຂສພ.ນວ) ໄດ້ຈັດກອງປະຊຸມສະຫຼຸບວຽກງານປະຈໍາປີ 2022 ແລະ ວາງທິດທາງແຜນການ ປະຈໍາປີ 2023 ໂດຍພາຍໄຕ້ການເປັນປະທານຂອງທ່ານ ທະນົງໄຊ ຄຸດໄພທູນ, ຫົວໜ້າ ຄຂສພ.ນວ ໂດຍມີພະນັກງານຫຼັກແຫຼ່ງທັງໝົດເຂົ້າຮ່ວມ 31 ທ່ານ.

ສະພາບລວມສໍາລັບ 05 ຂສພ ທີ່ຂຶ້ນກັບ ຄຂສພ.ນວ ຄື: ເຂດພັດທະນາກວມລວມໄຊເຊດຖາ, ຂສພ ບຶງທາດຫຼວງ, ຂສພ ລ່ອງແທ່ງ-ວຽງຈັນ, ຂສພ ດົງໂພສີ ແລະ ເຂດໂລຊິດສະຕິກ ນະຄອນຫຼວງວຽງຈັນ ແມ່ນມີເນື້ອທີ່ລວມກັນທັງໝົດ 2.360 ເຮັກຕາ ຊຶ່ງສາມາດດຶງດູດການລົງທຶນທັງໝົດ 176 ບໍລິສັດ, ແຜນລົງທຶນທັງໝົດປະມານ 5,7 ຕື້ໂດລາສະຫະລັດ ແລະ ມີມູນຄ່າການລົງທຶນຕົວຈິງ 2,8 ຕື້ໂດລາສະຫະລັດ, ປະຕິບັດພັນທະໃຫ້ແກ່ລັດຖະບານໄດ້ 227 ຕື້ກີບ; ສ້າງວຽກເຮັດງານທໍາໄດ້ 6649 ຄົນ, ໃນນິ້ເປັນແຮງງານລາວ 5,409 ຄົນ; ສົ່ງອອກສິນຄ້າມີມູນຄ່າ 289 ລ້ານໂດລາສະຫະລັດ ຈາກຜະລິດຕະພັນເຄື່ອງເອເລັກໂຕຣນິກ, ເຄື່ອງນຸ່ງຫົ່ມ, ອຸປະກອນການແພດ, ຢາປິ່ນປົວພະຍາດ, ອຸປະກອນແສງສະຫວ່າງ, ຫົວອາຫານສັດ, ນ້ຳມັນເຊື້ອໄຟ, ອາຫານສຳເລັດຮູບ-ເຄື່ອງດື່ມ ແລະ ອື່ນໆ.

ສະເພາະປີ 2022 ມີມູນຄ່າການລົງທຶນຕົວຈິງ 49,3 ລ້ານກວ່າໂດລາສະຫະລັດ ຈາກ 32 ບໍລິສັດ, ເພີ່ມຂື້ນ 8 ບໍລິສັດ ເມື່ອທຽບໃສ່ປີ 2021, ທຽບໃສ່ແຜນຄາດໝາຍສູ້ຊົນປີ 2022 ປະຕິບັດໄດ້ 128% (ແຜນການປີ 25 ບໍລິສັດ) ໂດຍມີແຜນການລົງທຶນທັງໝົດ 87,6 ລ້ານໂດລາສະຫະລັດ. ຈັດຕັ້ງປະຕິບັດພັນທະເຂົ້າງົບປະມານລັດ ໄດ້ທັງໝົດ 103,8 ຕື້ກີບ ທຽບໃສ່ປີ 2021 ເພື່ມຂື້ນ 25,3 ຕື້ກີບ; ເມື່ອທຽບໃສ່ແຜນຄາດໝາຍສູ້ຊົນປີ 2022 ປະຕິບັດໄດ້ 148% (ແຜນການປີ 70 ຕື້ກີບ).

ໃນໂອກາດນີ້ ທ່ານ ທະນົງໄຊ ຄຸດໄພທູນ ໄດ້ມີຄໍາເຫັນບາງຕອນພາຍຫຼັງທີ່ໄດ້ຮັບຟັງການລາຍງານໃນກອງປະຊຸມ ໂດຍທ່ານໄດ້ສະແດງຄວາມຊົມເຊີຍອ້າຍນ້ອງສະມາຊິກພາຍໃນ ທີ່ໄດ້ປະກອບສ່ວນທຸມເຫື່ອເທແຮງ ເຮັດຫຼ້ອນໜ້າທີ່ຕາມການມອບໝາຍຂອງຂັ້ນເທິງ ໂດຍສະເພາະແມ່ນການອຳນວຍຄວາມສະດວກຕາມກົນໄກບໍລິການຜ່ານປະຕູດຽວ ຄຂສພ.ນວ ສົມທົບກັບຂະແໜງການທີ່ກ່ຽວຂ້ອງ ສ້າງຕັ້ງຈຸດບໍລິການສ່ວຍສາອາກອນ, ຈຸດບໍລິການທະນາຄານຢູ່ຫ້ອງການ ຄຂສພ.ນວ ໃຫ້ຜູ້ພັດທະນາ, ຜູ້ລົງທຶນ ສາມາດຖອກພັນທະອາກອນ ຢູ່ພາຍໃນເຂດເສດຖະກິດພິເສດ ນະຄອນຫຼວງວຽງຈັນໄດ້ເລີຍ ພ້ອມກັນນີ້ ພວກເຮົາກໍ່ໄດ້ຮັບຄວາມຊ່ວຍເຫຼືອອຳນວຍຄວາມສະດວກ ຈາກເຈົ້າໜ້າທີ່ ປກສ, ປກຊ ໃນການຮັກສາຄວາມສະຫງົບ ໂດຍມາປະຈຳເຂດ 05 ເຂດ ເສດຖະກິດພິເສດນະຄອນຫຼວງວຽງຈັນມີທັງໝົດຈຳນວນ 150 ສະຫາຍ, ສ່ວນການປະຕິບັດມາດຕະການ ລວມເຖິງການຕິດຕາມຄວບຄຸມການລະບາດຂອງພະບາດໂຄວິດ-19 ກໍ່ເຫັນວ່າເຮັດໄດ້ດີສົມຄວນ.

ສໍາລັບທິດທາງແຜນການໃນປີ 2023 ຄະນະຄຸ້ມຄອງເຂດເສດຖະກິດພິເສດ ນະຄອນຫຼວງວຽງຈັນ ໄດ້ວາງບາງຄາດໝາຍສູ້ຊົນ ເປັນຕົ້ນແມ່ນ ດຶງດູດການລົງທຶນ ທັງພາຍໃນ ແລະ ຕ່າງປະເທດ ເຂົ້າບັນດາເຂດທີ່ຍັງມີເນື້ອທີ່ຮອງຮັບໃຫ້ໄດ້ຈໍານວນ 30 ບໍລິສັດ; ຕ້ອງສູ້ຊົນສ້າງວຽກເຮັດງານທໍາໃຫ້ແກ່ປະຊາຊົນລາວໃຫ້ໄດ້ປະມານ 2,500 ຕໍາແໜ່ງງານ ໂດຍເນັ້ນແຮງງານລາວເປັນສ່ວນໃຫຍ່; ຕ້ອງສ້າງຖານເກັບລາຍຮັບເຂົ້າງົບປະມານໃຫ້ໄດ້ 25 ຕື້ກວ່າກີບ; ແລະ ວຽກງານປິ່ນອ້ອມອື່ນໆ.

ໃນຕອນທ້າຍກອງປະຊຸມ ຍັງໄດ້ເປີດໂອກາດໃຫ້ສະມາຊິກປະກອບຄໍາຄິດຄໍາເຫັນຕາມຫຼັກການປະຊາທິປະໄຕ ເພື່ອເຮັດແນວໃດໃຫ້ບັນດາຄາດໝາຍສູຊົນຕ່າງໆສາມາດບັນລຸຕາມແຜນການທີ່ວາງໄວ້.