ໃນວັນທີ 08 ມິຖຸນາ 2023 ທີ່ຫ້ອງການສົ່ງເສີມ ແລະ ຄຸ້ມຄອງເຂດເສດຖະກິດພິເສດ, ກະຊວງ ແຜນການ ແລະ ການລົງທຶນ ໄດ້ຈັດພິທີ ເຊັນບົດບັນທຶກການຮ່ວມມື ລະຫວ່າງ ຫ້ອງການສົ່ງເສີມ ແລະ ຄຸ້ມຄອງ ເຂດເສດຖະກິດພິເສດ ກັບ ທ່ານ ເສີນກວ່າງປ່ຽວ ປະທານສະພາບໍລິຫານ ບໍລິສັດ ການນໍາໃຊ້ຊັບພະຍາກອນຄືນ ໃໝ່ ຈໍາກັດ ແລະ ບໍລິສັດ ລາວທາດຫຼວງລົງທຶນ ພັດທະນາ ຈໍາກັດ.
ຊຶ່ງໄດ້ຮັບກຽດເຂົ້າຮ່ວມໂດຍ ທ່ານ ຄໍາເຈນ ວົງໂພສີ, ລັດຖະມົນຕີ ກະຊວງແຜນການ ແລະ ການລົງທຶນ, ທ່ານ ສອນປະເສີດ ດາລາວົງ ຫົວໜ້າຫ້ອງການສົ່ງເສີມ ແລະ ຄຸ້ມຄອງເຂດເສດຖະກິດພິເສດ, ທ່ານ ທະນົງໄຊ ຄຸດໄພທູນ ຫົວໜ້າ ຄະນະຄຸ້ມຄອງ ເຂດເສດຖະກິດພິເສດ ນະຄອນຫຼວງວຽງຈັນ, ທ່ານ ເສີນກວ່າງປ່ຽວ ປະທານ ສະພາບໍລິຫານ ບໍລິສັດ ການນໍາໃຊ້ຊັບພະຍາກອນຄືນໃໝ່ ຈໍາກັດ ແລະ ທ່ານ ຫວງຊີວເວີນ ປະທານບໍລິສັດ ລາວ ທາດຫຼວງ ລົງທຶນ ພັດທະນາ ຈໍາກັດ ແລະ ບັນດາພາກສ່ວນທີ່ກ່ຽວຂ້ອງເຂົ້າຮ່ວມ.

ໃນໂອກາດນີ້ ທ່ານ ສອນປະເສີດ ດາລາວົງ, ຫົວໜ້າຫ້ອງການສົ່ງເສີມ ແລະ ຄຸ້ມຄອງເຂດເສດຖະກິດພິ ເສດໄດ້ກ່າວວ່າ: ການພັດທະນາເຂດເສດຖະກິດພິເສດ ຢູ່ ສປປ ລາວ ໄດ້ເລີ່ມສ້າງຕັ້ງຂື້ນໃນປີ 2003 ເປັນຕົ້ນມາ ໂດຍມາຮອດປັດຈຸບັນ ສປປ ລາວ ມີເຂດເສດຖະກິດພິເສດທີ່ໄດ້ຮັບການອະນຸມັດສ້າງຕັ້ງໃນຂອບເຂດ ທົ່ວປະເທດທັງໝົດ ຈໍານວນ 21 ເຂດ ທີ່ຕັ້ງຢູ່ 7 ແຂວງຄື: ແຂວງບໍ່ແກ້ວ, ແຂວງຫຼວງນໍ້າທາ, ນະຄອນຫຼວງວຽງຈັນ, ແຂວງຄໍາມ່ວນ, ແຂວງສະຫວັນນະເຂດ ແລະ ແຂວງຈໍາປາສັກ. ໃນນີ້ປະກອບມີ ເຂດອຸດສາຫະກໍາ, ເຂດທ່ອງທ່ຽວ, ເຂດການຄ້າ-ການບໍລິການ, ເຂດຂົນສົ່ງ (Logistic) ຊຶ່ງສາມາດດຶງດູດການລົງທຶນໄດ້ 1.235 ວິສາຫະກິດ (ເປັນ ບໍລິສັດພາຍໃນ 148 ບໍລິສັດ, ຕ່າງປະເທດ 1.033 ບໍລິສັດ ແລະ ພາຍໃນຮ່ວມກັບຕ່າງປະເທດ 54 ບໍລິສັດ). ໄດ້ນໍາໃຊ້ທີ່ດິນຕົວຈິງໃນການພັດທະນາ ພຽງແຕ່ 15 ພັນກວ່າເຮັກຕາ ໂດຍສາມາດສ້າງລາຍຮັບເຂົ້າງົບປະມານຂອງ ລັດໄດ້ທັງໝົດ 860 ຕື້ກວ່າກີບ. ສາມາດສ້າງວຽກເຮັດງານທໍາໄດ້ 63.935 ຄົນ ໃນນັ້ນເປັນແຮງງານ ຕ່າງປະເທດ 30.448 ຄົນ ແລະ ແຮງງານລາວ 33.447 ຄົນ. ໄດ້ນໍາເຂົ້າວັດຖຸດິບ, ເຄື່ອງກົນຈັກ ແລະ ອຸປະກອນ ເພື່ອມາຮັບໃຊ້ການຜະລິດ ແລະ ການກໍ່ສ້າງພື້ນຖານໂຄງລ່າງ ມູນຄ່າທັງໝົດ 5,8 ຕື້ກວ່າໂດລາສະຫະລັດ, ສົ່ງອອກສິນຄ້າມີ ມູນຄ່າທັງໝົດ 3 ຕື້ກວ່າໂດລາສະຫະລັດ.

ສໍາລັບນັກລົງທຶນຈາກ ສປ ຈີນ ທີ່ລົງທຶນໃນເຂດເສດຖະກິດພິເສດ ທີ່ແມ່ນຜູ້ພັດທະນາ ຈາກ ສປ ຈີນ ລົງທຶນ ນັ້ນມີ 06 ເຂດຄື: 1) ເຂດເສດຖະກິດພິເສດ ບໍ່ເຕ່ນແດນງາມ, 2) ເຂດເສດຖະກິດພິເສດ ສາມຫລ່ຽມຄໍາ, 3) ເຂດພັດທະນາກວມລວມໄຊເຊດຖາ, 4) ເຂດເສດຖະກິດພິເສດ ບຶງທາດຫລວງ, 5) ເຂດພັດທະນາເສດຖະກິດໃໝ່ ສີທັນດອນ ແລະ 6) ເຂດວີຕ້າປາກ. ນອກຈາກນີ້ກໍ່ຍັງມີບັນດາວິສາຫະກິດທີ່ເປັນ ນັກລົງທຶນ ຈາກ ສປ ຈີນ ດໍາເນີນກິດຈະການຢູ່ບັນດາ ຂສພ ອື່ນອີກ ລວມຈໍານວນ 855 ບໍລິສັດ ກວມເອົາ 69,23% ຂອງບັນດາວິສາຫະ ກິດທີ່ດໍາເນີນທຸລະກິດໃນເຂດເສດຖະກິດທົ່ວປະເທດ. ນັກລົງທຶນທີ່ມາຈາກ ສປ ຈີນ ລົງທຶນໃນເຂດເສດຖະກິດພິເສດແມ່ນມີຈໍານວນຫຼາຍພໍສົມຄວນຖ້າທຽບໃສ່ບັນດານັກລົງທຶນປະເທດອື່ນໆ.
ໂດຍລວມແລ້ວ ບັນດາວິສາຫະກິດຂອງ ສປ ຈີນ ທີ່ດໍາເນີນທຸລະກິດຢູ່ ໃນເຂດເສດຖະກິດພິເສດ ຂອບເຂດທົ່ວປະເທດກໍເຫັນວ່າມີຂໍ້ສະດວກຫຼາຍດ້ານ ແລະ ມີທ່າອ່ຽງເພີ່ມຂື້ນໃນແຕ່ລະປີ, ການເພີ່ມຂື້ນດັ່ງກ່າວເຫັນວ່າເປັນ ແນວໂນ້ມທີ່ດີ ສາເຫດຕົ້ນຕໍແມ່ນການເປີດປະເທດໃນໄລຍະຜ່ານມາ, ເສັ້ນທາງລົດໄຟລາວ-ຈີນ ແລະ ເສັ້ນທາງດ່ວນວຽງຈັນ-ວັງວຽງ ໄດ້ມີການເປີດນໍາໃຊ້ຢ່າງເປັນທາງການ ຊຶ່ງເປັນເງື່ອນໄຂໜຶ່ງທີ່ເອື້ອອໍານວຍຄວາມສະດວກໃຫ້ແກ່ນັກລົງທຶນເຂົ້າມາລົງທຶນໃນເຂດເສດຖະກິດພິເສດຫຼາຍຂຶ້ນ, ບວກກັບການປັບປຸງສະພາບແວດລ້ອມຕ່າງໆ ຢູ່ພາຍໃນເຂດເສດຖະກິດພິເສດໃຫ້ມີຄວາມສະດວກສະບາຍ ເປັນຕົ້ນ: ການພັດທະນາພື້ນຖານໂຄງລ່າງຂອງຜູ້ພັດທະນາ, ການແກ້ໄຂບັນຫາຂໍ້ຄົງຄ້າງຕ່າງໆ ແລະ ການປັບປຸງກົນໄກການບໍລິການປະຕູດຽວ.

ອີງໃສ່ທ່າແຮງ ແລະ ບາດກ້າວຂະຫຍາຍຕົວຂອງເຂດເສດຖະກິດພິເສດ ສປປ ລາວ ທີ່ນັບມື້ເພີ່ມຂຶ້ນນັ້ນ, ວຽກງານການດຶງດູດການລົງທຶນ ກໍ່ຖືເປັນວຽກງານໜຶ່ງທີ່ມີຄວາມສໍາຄັນຕໍ່ການປະກອບສ່ວນການພັດທະນາເຂດເສດຖະກິດຂອງຊາດ ກໍ່ຄືການພັດທະນາເຂດເສດຖະກິດພິເສດ. ຊຶ່ງໄລຍະຜ່ານມາ ຫຂສພ ພວກເຮົາກໍ່ໃຫ້ຄວາມສໍາຄັນໃນການໂຄສະນາດຶງດູດການລົງທຶນທັງພາຍໃນ ແລະ ຕ່າງປະເທດ ເປັນປົກກະຕິ. ສະນັ້ນ, ການລົງນາມບົດ ບັນທຶກຮ່ວມມື ລະຫວ່າງ ຫ້ອງການສົ່ງເສີມ ແລະ ຄຸ້ມຄອງເຂດເສດຖະກິດພິເສດ ກະຊວງແຜນການ ແລະ ການລົງທຶນ ກັບ ທ່ານ ເສີນກວ່າງປ່ຽວ ປະທານສະພາບໍລິຫານ ບໍລິສັດ ການນໍາໃຊ້ຊັບພະຍາກອນຄືນໃໝ່ ຈໍາກັດ ແລະ ບໍລິສັດ ລາວທາດຫຼວງລົງທຶນ ພັດທະນາ ຈໍາກັດ ໃນມື້ນີ້ ຈະເປັນອີກບາດກ້າວໜຶ່ງທີ່ຈະຊ່ວຍລະດົມທຸລະກິດການ ລົງທຶນທີ່ມີທ່າແຮງ ເຂົ້າມາລົງທຶນພັດທະນາ ຢູ່ເຂດເສດຖະກິດພິເສດໃຫ້ຫຼາຍຂຶ້ນ, ໂດຍສະເພາະແມ່ນຢູ່ ເຂດເສດຖະກິດພິເສດ ບຶງທາດຫຼວງ ແລະ ເຂດພັດທະນາເຕັກໂນໂລຊີລະດັບສູງ ຢູ່ເມືອງປາກງື່ມ ນະຄອນຫຼວງວຽງຈັນ.

ໂດຍໃນພິທີ ໄດ້ມີການຮ່ວມລົງນາມ ໃນບົດບັນທຶກການຮ່ວມມື ເພື່ອເປັນການສົ່ງເສີມ ແລະ ດຶງດູດການ ລົງທຶນ ໃຫ້ເຂົ້າມາລົງທຶນ ໃນເຂດເສດຖະກິດພິເສດ ບຶງທາດຫຼວງ ແລະ ເຂດພັດທະນາເຕັກໂນໂລຊີລະດັບສູງ ຢູ່ ເມືອງປາກງື່ມ, ນະຄອນຫຼວງວຽງຈັນ ຊຶ່ງຕາງໜ້າລົງນາມໂດຍ ທ່ານ ສອນປະເສີດ ດາລາວົງ ຫົວໜ້າຫ້ອງການ ສົ່ງເສີມ ແລະ ຄຸ້ມຄອງເຂດເສດຖະກິດພິເສດ, ກະຊວງແຜນການ ແລະ ການລົງທຶນ ຮ່ວມກັບ ທ່ານ ເສີນກວາງ ປ່ຽວ ປະທານສະພາບໍລິຫານ ບໍລິສັດ ການນໍາໃຊ້ຊັບພະຍາກອນຄືນໃໝ່ ຈໍາກັດ ແລະ ທ່ານ ຫວງຊີວເວີນ ປະທານ ບໍລິສັດ ລາວທາດຫຼວງ ລົງທຶນ ພັດທະນາ ຈໍາກັດ.