ໃນວັນສຸກ, ວັນທີ 27 ຕຸລາ 2023 ທີ່ຜ່ານມາ ຢູ່ທີ່ເມືອງວັງວຽງ, ແຂວງວຽງຈັນ ຄະນະຄຸ້ມຄອງເຂດເສດຖະກິດພິເສດ ນະຄອນຫຼວງວຽງຈັນ (ຄຂສພ.ນວ) ໄດ້ຈັດຊຸດຝືກອົບຮົມວຽກງານການຕ່າງປະເທດ ແລະ ວຽກງານພິທີການ ໃຫ້ບັນດາຄະນະຫ້ອງການ ແລະ ພະນັກງານວິຊາການຂອງ ຄຂສພ.ນວ ໂດຍການເປັນປະທານຮ່ວມຂອງ ທ່ານ ທະນົງໄຊ ຄຸດໄພທູນ, ຫົວໜ້າ ຄຂສພ.ນວ ແລະ ທ່ານ ວົງໄຊ ພົມມີໄຊ ຫົວໜ້າພະແນກການຕ່າງປະເທດ ນະຄອນຫຼວງວຽງຈັນ ໂດຍມີຜູ້ຕ່າງໜ້າຈາກກົມພິທີການ, ກະຊວງການຕ່າງປະເທດ, ວິທະຍາກອນ ແລະ ນັກສໍາມະນາກອນເຂົ້າຮ່ວມ.

     ໃນໂອກາດນີ້ ທ່ານ ທະນົງໄຊ ຄຸດໄພທູນ ໄດ້ກ່າວວ່າ ວຽກງານການພັດທະນາ ແລະ ຄຸ້ມຄອງ ເຂດເສດຖະກິດພິເສດ ແມ່ນວຽກງານໜຶ່ງທີ່ເປັນຍຸດທະສາດການພັດທະນາເສດຖະກິດ-ສັງຄົມໄລຍະໃໝ່ຂອງພັກ ແລະ ລັດຖະບານ ເພື່ອເຊື່ອງໂຍງການພັດທະນາຂອງ ສປປ ລາວ ເຂົ້າສູ່ພາກພື້ນ ແລະ ສາກົນ ໂດຍສະເພາະບັນດາ ຂສພ ທີ່ຕັ້ງຢູ່ໃນນະຄອນຫຼວງວຽງຈັນ ໄດ້ກາຍເປັນຈຸດສົນໃຈຂອງນັກທຸລະກິດຕ່າງປະເທດ ຊຶ່ງໃນແຕ່ລະວັນໄດ້ມີແຂກທັງພາຍໃນ ແລະ ຕ່າງປະເທດ ເຂົ້າມາເກັບກຳຂໍ້ມູນ, ມາຢ້ຽມຢາມ ເພື່ອຖອດຖອນບົດຮຽນ ແລະ ຫຼາຍກໍລະນີ ກໍກ້າວໄປສູ່ການລົງທຶນດຳເນີນທຸລະກິດຮ່ວມກັນ. ຊຶ່ງມັນໄດ້ສະແດງອອກຢ່າງຈະແຈ້ງຜ່ານຕົວເລກການລົງທຶນໃນ 5 ຂສພ ທີ່ຕັ້ງຢູ່ນະຄອນຫຼວງວຽງຈັນນັ້ນ ຈາກຈໍານວນການລົງທຶນ 221 ບໍລິສັດ ແມ່ນເປັນການລົງໂດຍກົງຈາກຕ່າງປະເທດສູງເຖິງ 180 ບໍລິສັດ ຫຼື ກວມອັດຕາຫຼາຍກວ່າ 80% ຂອງການລົງທຶນທັງໝົດໃນເຂດ. 

     ດ້ວຍສະພາບການດັ່ງກ່າວ ພະນັກງານຫຼັກແຫຼ່ງທີ່ເຮັດວຽກໃນຂົງເຂດ ຂສພ ຈຶ່ງມີຄວາມຈໍາເປັນທີ່ຈະຕ້ອງໄດ້ຮັບຮູ້ ແລະ ເຂົ້າໃຈເຖິງວຽກງານການພົວພັນກັບຕ່າງປະເທດ ລວມເຖິງວຽກງານພິທີການຕ່າງໆ ເພື່ອເຮັດແນວໃດໃຫ້ສາມາດເຊີນຊວນ, ດຶງດູດ, ສ້າງຄວາມສົນໃຈ ແລະ ປະທັບໃຈ ກໍ່ຄືການເຜີຍແຜ່ແນວທາງນະໂຍບາຍອັນຖືກຕ້ອງຂອງພັກ ແລະ ລັດຖະບານ ໃຫ້ແກ່ຜູ້ທີ່ເຂົ້າມາພົວພັນປະສານງານ ໂດຍສະເພາະແມ່ນການກະກຽມໃຫ້ແກ່ການເປັນເຈົ້າພາບກອງປະຊຸມສຸດຍອດອາຊຽນທີ່ ສປປ ລາວ ເຮົາຈະໄດ້ເປັນເຈົ້າພາບໃນປີ 2024 ທີ່ຈະມາເຖິງນີ້. ໃນຕອນທ້າຍ ທ່ານ ທະນົງໄຊ ຄຸດໄພທູນ ຍັງໄດ້ກ່າວສະແດງຄວາມຂອບໃຈເປັນຢ່າງສູງຕໍ່ການເສຍສະຫຼະເວລາອັນມີຄຸນຄ່າຂອງບັນດານັກວິທະຍາກອນ, ຄູຝຶກຈາກ ກະຊວງການຕ່າງປະເທດ ກໍ່ຄືພະແນກການຕ່າງປະເທດ ນະຄອນຫຼວງວຽງຈັນ.