ເຂດເສດຖະກິດພິເສດ ນະຄອນຫຼວງວຽງຈັນ ສະຫຼຸບວຽກງານການພັດທະນາ ແລະ ຄຸ້ມຄອງທີ່ພົ້ນເດັ່ນ ໃນປີ 2023, ທີ່ຜ່ານມາໃນຫວ່າງບໍ່ດົນມານີ້ ທ່ານ ທະນົງໄຊ ຄຸດໄພທູນ ຫົວໜ້າຄະນະຄຸ້ມຄອງເຂດເສດຖະກິດພິເສດ ນະຄອນຫຼວງວຽງຈັນ ໄດ້ລາຍງານກ່ຽວກັບການຈັດຕັ້ງປະຕິບັດວຽກງານຂອງຄະນະຄຸ້ມຄອງເຂດເສດຖະກິດພິເສດ ນະຄອນຫຼວງວຽງຈັນ ປະຈຳປີ 2023 ແລະ ທິດທາງແຜນການປີ 2024 ຕໍ່ກອງປະຊຸມສະຫຼຸບວຽກງານປະຈໍາປີຂອງຕົນ ໂດຍສະເພາະຜົນການຈັດຕັ້ງປະຕິບັດ ຂອງ 05 ເຂດເສດຖະກິດພິເສດ ຄື: ເຂດພັດທະນາກວມລວມໄຊເຊດຖາ, ເຂດເສດຖະກິດພິເສດ ບຶງທາດຫຼວງ, ເຂດເສດຖະກິດພິເສດ ລ່ອງແທ່ງ-ວຽງຈັນ, ເຂດເສດຖະກິດພິເສດ ດົງໂພສີ ແລະ ເຂດໂລຊິດສະຕິກ ນະຄອນຫຼວງວຽງຈັນ. ຊຶ່ງມາເຖິງປະຈຸບັນໄດ້ນໍາໃຊ້ ເນື້ອທີ່ທັງໝົດ 2.360 ເຮັກຕາ; ສາມາດດຶງດູດການລົງທຶນໄດ້ທັງໝົດ 229 ບໍລິສັດ; ໄດ້ລົງທຶນຕົວຈິງແລ້ວມູນຄ່າ 3 ຕື້ກວ່າໂດລາສະຫະລັດ ຈາກແຜນການລົງທຶນທັງໝົດ 6 ຕື້ກວ່າໂດລາສະຫະລັດ. ໃນນີ້ປະຕິບັດພັນທະເຂົ້າງົບປະມານຂອງລັດໄດ້ທັງໝົດ 278 ຕື້ກວ່າກີບ; ສ້າງວຽກເຮັດງານທໍາໄດ້ 9.623 ຄົນ; ການສົ່ງອອກສິນຄ້າມູນຄ່າ 354 ລ້ານໂດລາສະຫະລັດ; ສິນຄ້າທີ່ສົ່ງອອກປະກອບມີ: ເຄື່ອງເອເລັກໂຕຣນິກ, ເຄື່ອງນຸ່ງຫົ່ມ, ອຸປະກອນການແພດ, ຜະລິດຕະພັນຢາປິ່ນປົວພະຍາດ, ຜະລິດຕະພັນດອກໄຟ LED, ແຜ່ນໂຊລ້າແຊວ, ຜະລິດຕະພັນເຄື່ອງດື່ມ, ຊີ້ນອົບແຫ້ງ ແລະ ຜະລິດຕະພັນອື່ນໆ.

ສະເພາະການພັດທະນາໃນປີ 2023 ເຫັນວ່າໃນໄລຍະ 1 ປີທີ່ຜ່ານມາ ໄດ້ມີຜົນສໍາເລັດໃນຫຼາຍດ້ານຕາມຄາດໝາຍທີ່ວາງໄວ້, ອັນຜົນເດັ່ນແມ່ນສາມາດດຶງດູດການລົງທຶນໃໝ່ ຈາກພາຍໃນ ແລະ ຕ່າງປະເທດໄດ້ທັງໝົດ 56 ບໍລິສັດທຽບໃສ່ປີ 2022 ເພີ່ມຂຶ້ນ 24 ບໍລິສັດ, ທຽບໃສ່ແຜນຄາດໝາຍສູ້ຊົນປີ 2023 ປະຕິບັດໄດ້ 186% ໂດຍມີແຜນລົງທຶນທັງໝົດ 353 ລ້ານໂດລາສະຫະລັດ, ທຶນຈົດທະບຽນ 40 ລ້ານໂດລາສະຫະລັດ ແລະ ມີມູນຄ່າການລົງທຶນຕົວຈິງ 187 ລ້ານໂດລາສະຫະລັດ; ປະຕິບັດພັນທະເຂົ້າງົບປະມານຂອງລັດໄດ້ຈໍານວນ 51 ຕື້ກີບ ແລະ ສົ່ງອອກສິນຄ້າມູນຄ່າ 64 ລ້ານໂດລາສະຫະລັດ; ປັດຈຸບັນມີແຮງງານທັງໝົດ 9.623 ຄົນ, ແຮງງານລາວ 7,242 ຄົນ, ຕ່າງປະເທດ 2,381 ຄົນ ທຽບໃສ່ປີ 2022 ມີແຮງງານເພີ່ມຂື້ນ 3,327 ຄົນ; ທຽບໃສ່ແຜນຄາດໝາຍສູ້ຊົນປີ 2023 ປະຕິບັດໄດ້ 166% (ແຜນການປີ 2,000 ຄົນ); ສໍາເລັດການສ້າງຕັ້ງໜ່ວຍງານບໍລິການການລົງທຶນປະຕູດຽວ ປະຈໍາເຂດ ເຂດພັດທະນາກວມລວມໄຊເຊດຖາ, ເຂດເສດຖະກິດພິເສດ ບຶງທາດຫຼວງ, ເຂດເສດຖະກິດພິເສດ ລ່ອງແທ່ງ-ວຽງຈັນ; ຫັນເປັນທັນສະໄໝໃນການ ເຊື່ອມໂຍງລະບົບການແຈ້ງອາກອນທັນສະໄໝ (TAXRIS); ນໍາໃຊ້ລະບົບຢັ້ງຢືນແຫຼ່ງກໍາເນີດສິນຄ້າ ອອນລາຍ (E-CO); ນໍາໃຊ້ລະບົບການບໍລິຫານຫ້ອງການ G-chat, G-mail, G-drive.

ນອກຈາກນີ້ ກໍໄດ້ກຳນົດທິດທາງແຜນການໃນປີ 2024 ເພື່ອເປັນການປະກອບສ່ວນໃຫ້ການພັດທະນາເສດຖະກິດ-ສັງຄົມ ຂອງນະຄອນຫຼວງວຽງຈັນ ກໍ່ຄືໂດຍລວມຂອງຊາດ. ເຂດເສດຖະກິດພິເສດ ນະຄອນຫຼວງວຽງຈັນ ຈະໄດ້ສຸມໃສ່ບັນດາຄາດໝາຍສູ້ຊົນ ເປັນຕົ້ນແມ່ນ: ການຂົນຂວາຍ ດຶງດູດການລົງທຶນ ທັງພາຍໃນ ແລະ ຕ່າງປະເທດ ໃຫ້ໄດ້ 35 ບໍລິສັດ; ຊຸກຍູ້ການຈັດເກັບລາຍຮັບເຂົ້າງົບປະມານໃຫ້ໄດ້ຫລາຍກວ່າ 25 ຕື້ກີບ; ຊຸກຍູ້ການສ້າງວຽກເຮັດງານທໍາໃຫ້ແຮງງານລາວເພີ່ມອີກ 2,000 ຕໍາແໜ່ງງານ; ລວມເຖິງການຊຸກຍູ້ການຜະລິດເພື່ອທົດແທນການນຳເຂົ້າ ແລະ ການສົ່ງອອກສິນຄ້າ ຂອງບັນດາວິສາຫະກິດພາຍໃນເຂດ ແລະ ບັນວຽກງານປິ່ນອ້ອມອື່ນໆອີກຈໍານວນໜຶ່ງ.