ໃນວັນທີ 11 ມັງກອນ 2024 ຜ່ານມາ ທີ່ເຂດພັດທະນາກວມລວມໄຊເຊດຖາ ໄດ້ຈັດພິທີມອບ-ຮັບດອກໄຟ LED ເຍືອງທາງທີ່ນຳໃຊ້ພະລັງງານແສງຕາເວັນໃຫ້ແກ່ ເມືອງໄຊເສດຖາ, ເມືອງໄຊທານີ ແລະ ຄະນະຄຸ້ມຄອງເຂດເສດຖະກິດພິເສດ ນະຄອນຫຼວງວຽງຈັນ ໂດຍການເຂົ້າຮ່ວມຂອງທ່ານເຈົ້າເມືອງ ເມືອງ ໄຊເສດຖາ, ເມືອງ ໄຊທານີ, ຄະນະຄຸ້ມຄອງເຂດເສດຖະກິດພິເສດ ນະຄອນຫຼວງວຽງຈັນ ພ້ອມດ້ວຍພາກສ່ວນກ່ຽວຂ້ອງ, ອໍານາດການປົກຄອງບ້ານ ນາຍບ້ານ 06 ບ້ານທີ່ຢູ່ອ້ອມເຂດພັດທະນາກວມລວມໄຊເຊດຖາ ເຂົ້າຮ່ວມ.

ໃນໂອກາດນີ້ ທ່ານ ທະນົງໄຊ ຄຸດໄພທູນ, ຫົວໜ້າ ຄະນະຄຸ້ມຄອງເຂດເສດຖະກິດພິເສດ ນະຄອນຫຼວງວຽງຈັນ ໄດ້ກ່າວວ່າ ການມອບ-ຮັບດອກໄຟ LED ເຍືອງທາງທີ່ນຳໃຊ້ພະລັງງານແສງຕາເວັນໃນຄັ້ງນີ້ ເປັນການສຶບຕໍ່ເສີມຂະຫຍາຍຈາກບົດບັນທຶກຄວາມເຂົ້າໃຈລະຫວ່າງ ກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ ແຫ່ງ ສປປ ລາວ ແລະ ກະຊວງນິເວດ ແລະ ສິ່ງແວດລ້ອມ ແຫ່ງ ສປ ຈີນ ກ່ຽວກັບການຂະຫຍາຍເຂດສາທິດການປ່ອຍອາຍກາກບອນຕ່ຳໄລຍະທີ II ໃນການຊ່ວຍເຫຼືອອຸປະກອນ ພາຍໃຕ້ໂຄງການຮ່ວມມື ຕໍ່ກັບການປ່ຽນແປງດິນຟ້າອາກາດ. ດ້ວຍເຫດນັ້ນ ບໍລິສັດຮ່ວມທຶນລາວ-ຈີນ ໃນນາມຜູ້ພັດທະນາເຂດພັດທະນາກວມລວມໄຊເຊດຖາ ໄດ້ນຳໄປຕິດຕັ້ງພາຍໃນເຂດ ແລະ ມອບຕໍ່ໃຫ້ກັບ ເມືອງໄຊເສດຖາ, ເມືອງໄຊທານີ ແລະ ຄຂສພ.ນວ ໂດຍສະເພາະແມ່ນນຳໃຊ້ໃນບັນດາ 06 ບ້ານທີ່ຢູ່ອ້ອມຂ້າງຂອງເຂດດັ່ງກ່າວ ຈໍານວນທັງຫມົດ 120 ຊຸດ ລວມມູນຄ່າປະມານ 2,16 ຕື້ກີບ.

ໂຄງການມອບ-ຮັບ ດອກໄຟ LED ເຍືອງທາງທີ່ນຳໃຊ້ພະລັງງານແສງຕາເວັນ ໃນຄັ້ງນີ້ ຍັງເປັນການສືບຕໍ່ຜັນຂະຫຍາຍຄໍາຂວັນ 6 ສ ຂອງນະຄອນຫຼວງວຽງຈັນ ໂດຍສະເພາະ ສ ສະຫວ່າງ ທີ່ຈະຊ່ວຍອຳນວຍຄວາມສະດວກໃຫ້ແກ່ປະຊາຊົນໃນການສັນຈອນໄປມາໃນເວລາຄໍາຄືນ ກໍ່ຄືເວລາເຊົ້າມືດ ທີ່ຊາວກະຊິກອນຈະນໍາເອົາຜະລິດຕະພັນກະສິກຳຂອງຕົນອອກໄປຈໍາໜ່າຍສູ່ທ້ອງຕະຫຼາດ, ອີກດ້ານໜຶ່ງກໍ່ທັງເປັນການສົ່ງເສີມການນຳໃຊ້ພະລັງງານສະອາດໃຫ້ນັບມື້ກວ້າງຂວາງ ເພື່ອເຮັດໃຫ້ຕົວເມືອງນະຄອນຫຼວງວຽງຈັນພວກເຮົາ ນັບມື້ໜ້າຢູ່ ແລະ ກາຍເປັນຕົວແບບໃນການພັດທະນາແບບຢືນຢົງ ເປັນມິດກັບສິ່ງແວດລ້ອມ ໂດຍສະເພາະໃນໂອກາດທີ່ ສປປ ລາວ ຈະເປັນເຈົ້າພາບຈັດກອງປະຊຸມສຸດຍອດອາຊຽນ ແລະ ປີທ່ອງທ່ຽວລາວໃນປີ 2024 ນີ້.