LA 

ປະທານາທິບໍດີ ຕີມໍ-ເລສເຕ ຢ້ຽມຢາມ ເຂດພັດທະນາກວມລວມ ໄຊເຊດຖາ

   

ໃນວັນທີ 1 ມີນາ 2024 ທີ່ຜ່ານມາ, ພະນະທ່ານ ໂຈເຊ ຣາໂມສ ອໍຕ້າ ປະທານາທິບໍດີ ແຫ່ງ ສາທາລະນະລັດ ປະຊາທິປະໄຕ ຕີມໍ-ເລສເຕ ພ້ອມດ້ວຍຄະນະ ໄດ້ເດີນທາງມາຢ້ຽມຢາມເຂດພັດທະນາກວມລວມ ໄຊເຊດຖາ, ນະຄອນຫລວງວຽງຈັນ ໃນໂອກາດທີ່ຄະນະເດີນທາງມາຢ້ຽມຢາມທາງລັດຖະກິດຢູ່ ສປປ ລາວ ໃນລະຫວ່າງວັນທີ 27 ກຸມພາ ຫາ ວັນທີ 2 ມີນາ 2024, ໂດຍມີທ່ານນາງ ເຂັມມະນີ ພົນເສນາ ຫົວໜ້າຫ້ອງວ່າການສຳນັກງານປະທານປະເທດ ພ້ອມດ້ວຍຄະນະ ນໍາພາຢ້ຽມຢາມ ແລະ ຮ່ວມຕ້ອນຮັບໂດຍ ທ່ານ ທະນົງໄຊ ຄຸດໄພທູນ ຫົວໜ້າຄະນະຄຸ້ມຄອງເຂດເສດຖະກິດພິເສດ ນະຄອນຫລວງວຽງຈັນ ພ້ອມພາກສ່ວນກ່ຽວຂ້ອງເຂົ້າຮ່ວມ.
ໂອກາດນີ້ ທ່ານ ຫົວຫນ້າຄະນະຄຸ້ມຄອງເຂດເສດຖະກິດພິເສດ ນວ ໄດ້ລາຍງານໂດຍສັງເຂບກ່ຽວກັບສະພາບລວມການພັດທະນາເຂດເສດຖະກິດພິເສດ ຢູ່ ນະຄອນຫລວງວຽງຈັນ ເຊິ່ງປະຈຸບັນປະກອບມີ 5 ເຂດ ຄື: ເຂດພັດທະນາກວມລວມໄຊເຊດຖາ, ເຂດເສດຖະກິດພິເສດ ບຶງທາດຫລວງ, ເຂດເສດຖະກິດພິເສດ ລ່ອງແທ່ງ-ວຽງຈັນ, ເຂດເສດຖະກິດພິເສດ ດົງໂພສີ ແລະ ເຂດໂລຈິສະຕິກ ນະຄອນ ຫລວງວຽງຈັນ, ມີເນື້ອລວມທີ່ທັງໝົດ 2.360 ເຮັກຕາ ຕາມສັນຍາສຳປະທານ. ສາມາດດຶງດູດການລົງທຶນຈາກພາຍໃນ ແລະ ຕ່າງປະເທດໄດ້ທັງໝົດ 229 ບໍລິສັດ, ໂດຍມີແຜນການລົງທຶນ 6 ພັນລ້ານໂດລາສະຫະລັດ, ຊຶ່ງມາຮອດປະຈຸບັນລົງທຶນຕົວຈິງແລ້ວມູນຄ່າ 3 ພັນລ້ານໂດລາສະຫະລັດ, ສາມາດປະຕິບັດພັນທະເຂົ້າງົບປະມານລັດໄດ້ທັງໝົດ 278 ຕື້ກີບ, ສ້າງວຽກເຮັດງານທໍາໄດ້ 9.623 ຄົນ, ແລະ ສົ່ງອອກສິນຄ້າເປັນມູນຄ່າຫຼາຍກວ່າ 350 ລ້ານໂດລາສະຫະລັດ ທີ່ປະກອບມີ: ເຄື່ອງເອເລັກໂຕຣນິກ, ເຄື່ອງນຸ່ງຫົ່ມ, ຜະລິດຕະພັນການແພດ, ຜະລິດຕະພັນດອກໄຟແສງສະ ຫວ່າງ, ແຜ່ນໂຊລາເຊວ, ຜະລິດຕະພັນເຄື່ອງດື່ມ, ອາຫານ ແລະ ອື່ນໆ.
ສໍາລັບ ເຂດພັດທະນາກວມລວມ ໄຊເຊດຖາ ແມ່ນໂຄງການພັດທະນາທີ່ຮ່ວມທຶນລະຫວ່າງ ອົງການປົກຄອງນະຄອນຫລວງວຽງຈັນ, ຕາງໜ້າລັດຖະບານ ສປປ ລາວ ແລະ ບໍລິສັດ ລົງທຶນຕ່າງປະເທດແຂວງຢຸນນານ ຕາງໜ້າລັດຖະບານ ສປ ຈີນ ເພື່ອພັດທະນາແບບກວມລວມຄົບວົງຈອນ ທີ່ປະກອບດ້ວຍເຂດອຸດສາຫະກຳທັນສະໄໝ, ເຂດການຄ້າ, ການບໍລິການ, ເຂດການຂົນສົ່ງ ແລະ ເຂດຕົວເມືອງໃໝ່ ຂອງນະຄອນຫລວງວຽງຈັນ. ຊຶ່ງມາເຖິງປະຈຸບັນເຂດໄຊເຊດຖາ ມີ 132 ວິສາຫະກິດເຂົ້າມາລົງທຶນ, ທີ່ມີການລົງທຶນຕົວຈິງໄປແລ້ວຫຼາຍກວ່າ 2,4 ຕື້ກວ່າໂດລາສະຫະລັດ, ມີແຮງງານໃນເຂດ 7.828 ຄົນ, ສາມາດປະຕິບັດພັນທະໃຫ້ລັດໄດ້ 203 ຕື້ກີບ. ວິສາຫະກິດທີ່ເຂົ້າມາເຊັ່ນ: ບໍລິສັດ ໂຮຢາລາວ ຈຳກັດ ຈາກປະເທດ ຢີປຸ່ນ ໂຮງງານຜະລິດເລນແວ່ນຕາ ແລະ ແຜນຣາດດິດເພື່ອ ສົ່ງອອກ, ບໍລິສັດ ຄວາມຫວັງໃໝ່ ຈຳກັດ ຈາກປະເທດ ສິງກະໂປ ຜະລິດຫົວອາຫານສັດຈໍາໜ່າຍພາຍໃນປະເທດ, ບໍລິສັດ ເປ້ເຕີເຄື່ອງນຸ່ງຫົ່ມ ຈຳກັດ ຜະລິດເຄື່ອງນຸ່ງຫົ່ມສົ່ງອອກຕ່າງປະເທດ, ບໍລິສັດ ຈົງຫລິ້ນເຕັກໂນໂລຊີ ຈຳກັດຜູ້ດຽວ ຜະລິດແຜ່ນໂຊລາເຊວ, ບໍລິສັດ ຟາມາກຣຸບ ຈຳກັດ ຜະລິດຕະພັນການແພດ ແລະ ບໍລິສັດອື່ນໆ.



ຄະນະຄຸ້ມຄອງເຂດເສດຖະກິດພິເສດນະຄອນຫຼວງວຽງຈັນ
Vientiane Spacial Economic Zone Authority
ຕິດຕໍ່ພວກເຮົາ

ເບີໂທ : +856 21 419336
ແຟັກ : +856 21 419336
ອີເມວ : info@vseza.gov.la

ຜູ້ເຂົ້າຊົມເວັບໄຊ

6552
Copyright © 2023 VSEZA , All rights reserved