LA 

ການແຂ່ງຂັນເຕະບານ ມິດຕະພາບ 4 ພາກສ່ວນ ເພື່ອສ້າງຂະບວນການຂໍ່ານັບຮັບຕ້ອນກອງປະຊຸມສາມຂັ້ນ ແລະ ກອງປະຊຸມໃຫຍ່ ຄັ້ງທີ ll

   

ຄະນະຄຸ້ມຄອງເຂດເສດຖະກິດພິເສດ ນະຄອນຫຼວງວຽງຈັນ (ຄຂສພ. ນວ) ຄອງແຊ໋ມການແຂ່ງຂັນກິລາເຕະບານ ມິດຕະພາບ 4 ພາກສ່ວນ ລະຫວ່າງ ຄຂສພ. ນວ ແລະ ເຂດພັດທະນາກວມລວມໄຊເຊດຖາ ກັບບັນດາບໍລິສັດທີ່ລົງທຶນຢູ່ໃນເຂດພັດທະນາກວມລວມໄຊເຊດຖາ ເພື່ອສ້າງຂະບວນການຂໍ່ານັບຮັບຕ້ອນກອງປະຊຸມສາມຂັ້ນ ແລະ ກອງປະຊຸມໃຫຍ່ ຄັ້ງທີ ll ຂອງໜ່ວຍພັກຮາກຖານ ຄຂສພ. ນວ ຈະໄຂຂຶ້ນໃນໄວໆນີ້ ແນໃສ່ເປີດໂອກາດໃຫ້ພະນັກງານໄດ້ສະແດງທັກສະດ້ານກິລາ ແລະ ຊຸກຍູ້ໃຫ້ມີສຸຂະພາບແຂງແຮງ ເພື່ອພ້ອມກັນຈັດຕັ້ງປະຕິບັດການປົກປັກຮັກສາ ແລະ ພັດທະນາເສດຖະກິດ-ສັງຄົມຂອງປະເທດຊາດ ໃຫ້ສຳເລັດໄປຕາມຈຸດປະສົງ ແລະ ເປົ້າໝາຍທີ່ວາງໄວ້.
ການແຂ່ງຂັນກິລາບານເຕະ ມິດຕະພາບ 4 ພາກສ່ວນ ໃນຄັ້ງນີ້ ໂດຍໄດ້ຮັບການສະໜັບສະໜູນຫຼັກຈາກບັນດາພາກສ່ວນຜູ້ລົງທຶນຢູ່ໃນເຂດພັດທະນາກວມລວມໄຊເຊດຖາກັບຜູ້ພັດທະນາ ຈັດຂຶ້ນ ໃນວັນທີ 30 ສິງຫາ ຜ່ານມາ ສະໜາມກິລາທະນົງອາດ (ບຶງທາດຫຼວງ) ໃຫ້ກຽດເຂົ້າຮ່ວມ ແລະ ມອບລາງວັນໂດຍທ່ານ ທະນົງໄຊ ຄຸດໄພທູນ ຫົວໜ້າຄະນະຄຸ້ມຄອງເຂດເສດຖະກິດພິເສດນະຄອນຫຼວງວຽງຈັນ, ມີບັນດາປະທານບໍລິສັດ ຮ່ວມທຶນ ລາວ-ຈີນ ຈຳກັດ, ບໍລິສັດ ຈົ່ງຫຼຸ້ນໂຊລ້າ ເຕັກໂນໂລຊີ (ລາວ) ຈໍາກັດຜູ້ດຽວ ແລະ ບໍລິສັດ ຊັນນີເວີສເທັກໂນໂລຊີ ຈຳກັດຜູ້ດຽວ ພ້ອມດ້ວຍບັນດາພະນັກງານເຂົ້າຮ່ວມ 100 ກວ່າຄົນ.
ການແຂ່ງຂັນລາຍການນີ້ ຈັດຂຶ້ນ ນອກຈາກສ້າງຂະບວນການຂໍ່ານັບຮັບຕ້ອນກອງປະຊຸມດັ່ງກ່າວ ກໍຍັງເປັນການເສີມສ້າງຄວາມສາມັກຄີຮັກແພງໃຫ້ພະນັກງານ ເປີດໂອກາດໃຫ້ເຂົາເຈົ້າໄດ້ສະແດງທັກສະດ້ານກິລາ ແລະ ຊຸກຍູ້ໃຫ້ມີສຸຂະພາບແຂງແຮງ ເພື່ອພ້ອມກັນຈັດຕັ້ງປະຕິບັດການປົກປັກຮັກສາ ແລະ ພັດທະນາເສດຖະກິດ-ສັງຄົມຂອງປະເທດຊາດ ໃຫ້ສຳເລັດໄປຕາມຈຸດປະສົງ ແລະ ເປົ້າໝາຍທີ່ວາງໄວ້ ຊຶ່ງມີທີມເຂົ້າຮ່ວມທັງໝົດ 4 ພາກສ່ວນ ປະກອບມີ ທີມຄະນະຄຸ້ມຄອງເຂດເສດຖະກິດພິເສດ ນວ, ບໍລິສັດ ຮ່ວມທຶນ ລາວ-ຈີນ ຈຳກັດ, ບໍລິສັດ ຈົ່ງຫຼຸ້ນໂຊລ້າ ເຕັກໂນໂລຊີ (ລາວ) ຈໍາກັດຜູ້ດຽວ ແລະ ບໍລິສັດ ຊັນນີເວີສເທັກໂນໂລຊີ ຈຳກັດຜູ້ດຽວ ຮູບແບບການຈັບສະຫຼາກປະກົບຄູ່ແຂ່ງຂັນ ຄັດເລືອກເອົາທີມຊະນະຜ່ານໄປຊີງຊະນະເລີດ ແລະ ທີມເສຍໄປຊີງອັນດັບທີ 3.
ຜ່ານການແຂ່ງຂັນຜົນປະກົດວ່າ ໃນນັດຊີງຊະນະເລີດ ທີມຄະນະຄຸ້ມຄອງເຂດເສດຖະກິດພິເສດ ນວ ຖືກ ບໍລິສັດ ຈົ່ງຫຼຸ້ນໂຊລ້າ ເຕັກໂນໂລຊີ ຍິງປະຕູອອກນຳໄປກ່ອນ ແຕ່ໃນເວລາທີເຫຼືອ ກໍເປັນຄະນະຄຸ້ມຄອງເຂດເສດຖະກິດພິເສດ ນວ ສາມາດເຂັ່ນຟອມເກັ່ງ ຍິງ 3 ປະຕູ ລວດ ໄລ່ຕ້ອນເອົາຊະນະ ບໍລິສັດ ຈົ່ງຫຼຸ້ນໂຊລ້າ ເຕັກໂນໂລຊີ 3 ປະຕູຕໍ່ 1 ຄວ້າແຊ໋ມລາຍການດັ່ງກ່າວໄປຄອງ ສ່ວນບໍລິສັດ ຈົ່ງຫຼຸ້ນໂຊລ້າ ເຕັກໂນໂລຊີ ໄດ້ພຽງອັນດັບທີ 2 ສ່ວນອັນດັບທີ 3 ເປັນຂອງ ບໍລິສັດ ຮ່ວມທຶນ ລາວ-ຈີນ ຈຳກັດ ແລະ ອັນດັບທີ 4 ເປັນຂອງບໍລິສັດ ຊັນນີເວີສເທັກໂນໂລຊີ ຈຳກັດຜູ້ດຽວ
ພາບ-ຂ່າວໂດຍ ສົງການ ພັນແພງດີ
 



ຄະນະຄຸ້ມຄອງເຂດເສດຖະກິດພິເສດນະຄອນຫຼວງວຽງຈັນ
Vientiane Spacial Economic Zone Authority
ຕິດຕໍ່ພວກເຮົາ

ເບີໂທ : +856 21 419336
ແຟັກ : +856 21 419336
ອີເມວ : info@vseza.gov.la

ຜູ້ເຂົ້າຊົມເວັບໄຊ

6552
Copyright © 2023 VSEZA , All rights reserved