LA 

ກຳມະບານຮາກຖານ ຄຂສພ ນວ ສຳເລັດກອງປະຊຸມໃຫຍ່ l ພ້ອມເລືອກໄດ້ຄະນະປະທານຊຸດໃໝ່

   

ກຳມະບານຮາກຖານ ຄຂສພ ນວ ສຳເລັດກອງປະຊຸມໃຫຍ່ l ພ້ອມເລືອກໄດ້ຄະນະປະທານຊຸດໃໝ່
ກຳມະບານຮາກຖານ ຄະນະຄຸ້ມຄອງເຂດເສດຖະກິດພິເສດ ນະຄອນຫຼວງວຽງຈັນ ຫຼື ຄຂສພ ນວ ສຳເລັດການຈັດກອງປະຊຸມໃຫຍ່ ຄັ້ງທີ l ໂດຍໄດ້ເປັນເອກະພາບກັນຮັບຮອງເອົາບັນດາເນື້ອໃນສຳຄັນ ໂດຍສະເພາະຮັບຮອງເອົາບົດລາຍງານ ການເມືອງຂອງຄະນະກຳມະບານຮາກຖານ ຄຂສພ ນວ ໃນໄລຍະຜ່ານມາ ແລະ ທິດທາງໃນ 5 ປີ ຕໍ່ໜ້າ ປີ 2024-2028 ແນໃສ່ຈັດຕັ້ງປະຕິບັດໃຫ້ສຳເລັດຕາມຈຸດປະສົງທີ່ວາງໄວ້ ພ້ອມທັງເລືອກໄດ້ຄະນະປະທານກຳມະບານຮາກຖານ ຄຂສພ ນວ ໂດຍເລືອກສະຫາຍ ລັດສະໝີ ສູນດາລາ ເປັນປະທານກຳມະບານຮາກຖານ ຄຂສພ ນວ ສະໄໝທີ 2 ຕິດຕໍ່ກັນ.
ກອງປະຊຸມໃຫຍ່ ຄັ້ງທີ l ສະມາຊິກກຳມະບານຮາກຖານ ຄຂສພ ນວ ໄດ້ໄຂຂຶ້ນ ໃນວັນທີ 5 ກັນຍາ ຜ່ານມາ ທີ່ຫ້ອງວາງສະແດງເຂດພັດທະນາກວມລວມໄຊເສດຖາ ນະຄອນຫຼວງວຽງຈັນ ຊຶ່ງດຳເນີນເປັນເວລາເຄິ່ງວັນ ໂດຍພາຍໃຕ້ການເປັນປະທານຮ່ວມມີສະຫາຍ ດາວເພັດ ອາລຸນ ກຳມະການພັກ ນະຄອນຫຼວງວຽງຈັນ, ຄະນະບໍລິຫານງານສູນກາງສະຫະພັນກຳມະບານລາວ ທັງເປັນປະທານສະຫະພັນກຳມະບານ ນະຄອນຫຼວງວຽງຈັນ, ສະຫາຍ ທະນົງໄຊ ຄຸດໄພທູນ ກຳມະການພັກ ນະຄອນຫຼວງວຽງຈັນ, ເຂລາໜ່ວຍພັກຮາກຖານ ທັງເປັນຫົວໜ້າຄະນະຄຸ້ມຄອງເຂດເສດຖະກິດພິເສດ ນະຄອນຫຼວງວຽງຈັນ ແລະ ສະຫາຍ ລັດສະໝີ ສູນດາລາ ສະຫາຍ ລັດສະໝີ ສູນດາລາ ປະທານກຳມະບານ ຄະນະຄຸ້ມຄອງເຂດເສດຖະກິດພິເສດ ນະຄອນຫຼວງວຽງຈັນ, ຫົວໜ້າຜູ້ປະຈຳການປະຕູດຽວເຂດພັດທະນາກວມລວມໄຊເສດຖາ ທັງເປັນຫົວໜ້າຂະແໜງຄຸ້ມຄອງແຮງງານ ຄະນະຄຸ້ມຄອງເຂດເສດຖະກິດພິເສດ ນະຄອນຫຼວງວຽງຈັນ ພ້ອມດ້ວຍຄະນະປະທານ, ບັນດາສະຫາຍສະມາຊິກກຳມະບານ 51 ສະຫາຍ, ຍິງ 16 ສະຫາຍ ແລະ ແຂກຖືກເຊີນ 28 ສະຫາຍ, ຍິງ 12 ສະຫາຍເຂົ້າຮ່ວມ.
ໃນກອງປະຊຸມບັນດາຜູ້ແທນທີ່ເຂົ້າຮ່ວມ ກໍໄດ້ຍົກສູງຄວາມຮັບຜິດຊອບການເມືອງ, ສຸມສະຕິປັນຍາຂອງຕົນເຂົ້າໃນການຄົ້ນຄວ້າບັນດາເນື້ອໃນສຳຄັນຂອງກອງປະຊຸມ ຢ່າງຟົດຟື້ນ ແລະ ບັນລຸໄດ້ຜົນສຳເລັດຕາມຈຸດປະສົງຄາດໝາຍທີ່ວາງໄວ້ ໂດຍໄດ້ເປັນເອກະພາບກັນຮັບຮອງເອົາບັນດາເນື້ອໃນສຳຄັນ ຄື: ຮັບຮອງເອົາບົດລາຍງານການເມືອງຂອງຄະນະກຳມະບານຮາກຖານ ຄຂສພ ນວ ໃນໄລຍະຜ່ານມາ ແລະ ທິດທາງໃນ 5 ປີ ຕໍ່ໜ້າ ປີ 2024-2028 ແລະ ບົດສຳຫຼວດການນຳພາຂອງຄະນະກຳມະບານຮາກຖານ ຄຂສພ ນວ ຊຸດເກົ່າ ບົນພື້ນຖານຄວາມຖືກຕ້ອງ, ສອດຄ່ອງຕາມມາດຕະຖານເງື່ອນໄຂ ແລະ ລະບຍບການທີ່ກຳນົດໄວ້, ຊຶ່ງໄດ້ຕີລາຄາດ້ານດີ, ດ້ານອ່ອນ ແລະ ບົດຮຽນທີ່ຖອດຖອນໄດ້ ໃນການຊີ້ນຳ-ນຳພາ ຈັດຕັ້ງປະຕິບັດ ມະຕິກອງປະຊຸມໃຫຍ່ ໃນໄລຍະຜ່ານມາ ແລະ ທິດທາງແຜນການຕໍ່ໜ້າ.
ໃນກອງປະຊຸມຍັງໄດ້ຈັດພິທີມອບ-ຮັບ ໃບຢັ້ງຢືນ 5 ເປັນເຈົ້າ ໃຫ້ກຳມະບານຮາກຖານ ຄຂສພ ນວ. ພ້ອມກັນນັ້ນ, ບັນດາສະຫາຍ ສະມາຊິກກຳມະບານ ກອງປະຊຸມໃຫຍ່ ໄດ້ໃຊ້ສິດປະຊາທິປະໄຕ ປ່ອນບັດຄັດເລືອກເອົາຄະນະກຳມະບານຮາກຖານ ຄຂສພ ນວ ຊຸດໃໝ່ ຊຶ່ງປະກອບດ້ວຍຜູ້ທີ່ມີມາດຖານ, ເງື່ອນໄຂຄົບຖ້ວນ ຕາມທີ່ໄດ້ກຳນົດໄວ້ໃນກົດລະບຽບຂອງກຳມະບານ ເພື່ອສືບຕໍ່ນຳພາຜັນຂະຫຍາຍມະຕິກອງປະຊຸມໃຫຍ່ ຄັ້ງທີ l ສະມາຊິກກຳມະບານຮາກຖານ ຄຂສພ ນວ ຊຶ່ງມີທັງໝົດ 7 ສະຫາຍເຂົ້າຮ່ວມເລືອກຕັ້ງ ແລະ ຜົນປະກົດວ່າ ສະຫາຍ ລັດສະໝີ ສູນດາລາ ໄດ້ສືບຕໍ່ເປັນປະທານຄະນະກຳມະບານຮາກຖານ ຄຂສພ ນວ ອີກ 1 ສະໄໝ ສ່ວນສະຫາຍ ນາງ ແສງອາລຸນທອນ ບຸຜາສວັນ ແລະ ສະຫາຍ ບຸນໜັກ ສົມສີຫາ ທັງສອງເປັນຮອງປະທານຄະນະກຳມະບານຮາກຖານ ຄຂສພ ນວ ຂະນະທີ່ສະຫາຍ ນາງ ເພັດໄພລິນ ສີສານ ແລະ ສະຫາຍ ອິນທະນົງສັກ ວໍລະລາດ ເປັນຄະນະ. ນອກຈາກນັ້ນ, ກໍຍັງໄດ້ເລືອກເອົາຜູ້ແທນສົມບູນ ສະມາຊິກກຳມະບານ ເຂົ້າຮ່ວມກອງປະຊຸມໃຫຍ່ lX ຜູ້ແທນສະຫະພັນກຳມະບານ ນະຄອນຫຼວງວຽງຈັນ 2 ສະຫາຍ ກໍຄື ສະຫາຍ ລັດສະໝີ ສູນດາລາ ເປັນຜູ້ແທນສົມບູນ ແລະ ສະຫາຍ ນາງ ແສງອາລຸນທອນ ບຸຜາສວັນ ເປັນຜູ້ແທນສຳຮອງ.
ໃນໂອກາດນີ້, ສະຫາຍ ດາວເພັດ ອາລຸນ ກໍໄດ້ຊີ້ທິດເຢື່ອງທາງໃນການຈັດຕັ້ງປະຕິບັດວຽກງານຕົວຈິງຂອງສະມາຊິກຂອງສະມາຊິກກຳມະບານຮາກຖານ ໃນແຕ່ລະໄລຍະໃຫ້ສຳເລັດຕາມຈຸດປະສົງ ຄຽງຄູ່ກັບການຈັດຕັ້ງປະຕິບັດແຜນການເຄື່ອນໄຫວ 5 ເປັນເຈົ້າໃຫ້ປະສົບຜົນສຳເລັດຕາມຄາດໝາຍທີ່ວາງໄວ້.
 



ຄະນະຄຸ້ມຄອງເຂດເສດຖະກິດພິເສດນະຄອນຫຼວງວຽງຈັນ
Vientiane Spacial Economic Zone Authority
ຕິດຕໍ່ພວກເຮົາ

ເບີໂທ : +856 21 419336
ແຟັກ : +856 21 419336
ອີເມວ : info@vseza.gov.la

ຜູ້ເຂົ້າຊົມເວັບໄຊ

6552
Copyright © 2023 VSEZA , All rights reserved