LA 

ຄະນະຄຸ້ມຄອງເຂດເສດຖະກິດພິເສດ ນະຄອນຫຼວງວຽງຈັນ ເຂົ້າຮ່ວມກອງປະຊຸມຕິດຕາມ ແລະ ຊຸກຍູ້ການຈັດຕັ້ງປະຕິບັດວຽກງານຂອງເຂດເສດຖະກິດພິເສດ ຮ່ວມກັບ ສະພາແຫ່ງຊາດ

   

             ວັນທີ 26 ຕຸລາ 2021 ໄດ້ມີກອງປະຊຸມທາງໄກຜ່ານລະບົບ Online (ZOOM) ເພື່ອຕິດຕາມ ແລະ ຊຸກຍູ້ການຈັດຕັ້ງປະຕິບັດວຽກງານເຂດເສດຖະກິດພິເສດ (ຂສພ) ພາຍໃຕ້ການເປັນປະທານຂອງທ່ານ ປອ ເກດແກ້ວ ສີຫາລາດ, ຮອງປະທານກຳມາທິການແຜນການ, ການເງິນ ແລະ ການກວດສອບ ຂອງສະພາແຫ່ງຊາດ. ໃນນັ້ນ, ເຂົ້າຮ່ວມກອງປະຊຸມປະກອບມີ ຫົວໜ້າຫ້ອງການສົ່ງເສີມ ແລະ ຄຸ້ມຄອງເຂດເສດຖະກິດພິເສດ, ກະຊວງແຜນການ ແລະ ການລົງທຶນ, ປະທານ ແລະ ຮອງປະທານສະພາປະຊາຊົນແຂວງ ແລະ ນະຄອນຫຼວງ, ສະມາຊິກສະພາແຫ່ງຊາດ ແລະ ສະພາປະຊາຊົນ ບ່ອນທີ່ ຂສພ ຕັ້ງຢູ່ ລວມເຖິງ ຄະນະຄຸ້ມຄອງເຂດເສດຖະກິດພິເສດ ນະຄອນຫຼວງ/ແຂວງ, ບໍລິສັດຜູ້ພັດທະນາ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.
ຈຸດປະສົງຂອງກອງປະຊຸມໃນຄັ້ງນີ້ແມ່ນການຕິດຕາມ ແລະ ຊຸກຍູ້ການຈັດຕັ້ງປະຕິບັດວຽກງານຂອງເຂດເສດຖະກິດພິເສດ ຂອງກຳມາທິການແຜນການ, ການເງິນ ແລະ ກວດສອບຂອງສະພາແຫ່ງຊາດ ພ້ອມທັງເກັບກຳຂໍ້ມູນຢູ່ບັນດາ ຂສພ ໃນຂອບເຂດທົ່ວປະເທດ ນໍາມາເປັນຂໍ້ມູນພຶ້ນຖານລາຍງານຄະນະປະຈໍາ ແລະ ກອງປະຊຸມສະໄໝສາມັນເທື່ອທີ 2 ຂອງສະພາແຫ່ງຊາດຊຸດທີ IX ໂດຍສະເພາະ ແມ່ນການຕີລາຄາສະພາບການຈັດຕັ້ງປະຕິບັດໄລຍະຜ່ານມາ ເຊັ່ນ: ດ້ານການລົງທຶນ, ດ້ານນິຕິກຳ, ການບໍລິຫານຜ່ານປະຕູດຽວ, ການປະຕິບັດພັນທະ, ການສ້າງວຽກເຮັດງານທໍາ, ການຊົດເຊີຍ ແລະ ອື່ນໆ.
ໃນໂອກາດນີ້ ທ່ານ ທະນົງໄຊ ຄຸດໄພທູນ, ຫົວໜ້າຄະນະຄຸ້ມຄອງເຂດເສດຖະກິດພິເສດ ນະຄອນຫຼວງວຽງຈັນ ໄດ້ປະກອບຄໍາເຫັນຕໍ່ກັບສະພາບການຈັດຕັ້ງປະຕິບັດໄລຍະຜ່ານມາເປັນຕົ້ນແມ່ນ ສາມາດດຶງດູດການລົງທຶນໄດ້ທັງໝົດ 176 ບໍລິສັດ, ມີທຶນຈົດທະບຽນ 864 ລ້ານໂດລາສະຫະລັດ, ແຜນການລົງທຶນ 6 ຕື້ກວ່າໂດລາສະຫະລັດ; ມູນຄ່າການລົງທຶນຕົວຈິງ 2,77 ຕື້ໂດລາສະຫະລັດ. ມີແຮງງານທັງໝົດ 5.763 ຄົນ. ສາມາດມອບພັນທະເຂົ້າງົບປະມານໄດ້ 58 ຕື້ກວ່າກີບ (ໃນນັ້ນມາຈາກຄ່າສໍາປະ ທານທີ່ດິນ, ອາກອນເງິນເດືອນ, ອາກອນ ຊົມໃຊ້, ອາກອນມູນຄ່າເພີ່ມ, ອາກອນລາຍໄດ້ ແລະ ຄ່າທໍານຽມຄ່າບໍລິການ).
ນອກຈາກນີ້, ກອງປະຊຸມຍັງໄດ້ໃຫ້ຄວາມສໍາຄັນຕໍ່ການສ້າງວຽກເຮັດງານທໍາຂອງແຮງງານລາວ ເຂົ້າມາໃນເຂດເສດຖະກິດພິເສດ ຊຶ່ງເຫັນວ່າປະຈຸບັນ ຫຼາຍທ້ອງຖິ່ນແມ່ນຍັງມີການຫວ່າງງານ ໃນຂະນະທີ່ບັນດາຫົວໜ່ວຍທຸລະກິດໃນ ຂສພ ເອງກໍ່ຍັງຕ້ອງການແຮງງານຫຼາຍສິບພັນຄົນ ເພື່ອສະໜອງເຂົ້າໃນຂະບວນການຜະລິດ ແລະ ການປຶກສາຫາລືກ່ຽວກັບກົນໄກໃນການດຶງດູດເອົານັກທຸລະກິດເຂົ້າມາລົງທຶນໃນໄລຍະທີ່ມີການປະຕິບັດມາດຕະການປ້ອງກັນໂຄວິດ-19 ຈະມີວິທີທາງຄືແນວໃດ ເພື່ອບໍ່ເປັນການທ່ວງດຶງການລົງທຶນ ແຕ່ກໍ່ຕ້ອງຮັບປະກັນໃຫ້ແກ່ການຕິດຕາມຄວບຄຸມພະຍາດໂຄວິດ-19 ແລະ ບັນຫາອື່ນໆ.
 



ຄະນະຄຸ້ມຄອງເຂດເສດຖະກິດພິເສດນະຄອນຫຼວງວຽງຈັນ
Vientiane Spacial Economic Zone Authority
ຕິດຕໍ່ພວກເຮົາ

ເບີໂທ : +856 21 419336
ແຟັກ : +856 21 419336
ອີເມວ : info@vseza.gov.la

ຜູ້ເຂົ້າຊົມເວັບໄຊ

6552
Copyright © 2023 VSEZA , All rights reserved