LA 

ທ່ານ ພູວົງ ວົງຄໍາຊາວ ຮອງເຈົ້າຄອງ, ຫົວໜ້າຄະນະສະເພາະກິດ ເພື່ອປ້ອງກັນ, ຄວບຄຸມ ແລະ ແກ້ໄຂການແຜ່ລະບາດຂອງພະຍາດ ໂຄວິດ - 19 ນະຄອນຫຼວງວຽງຈັນ

   

            ໃນວັນທີ 11 ຕຸລາ 2021 ເວລາ 13:30 ໂມງ ນໍາໂດຍ ທ່ານ ພູວົງ ວົງຄໍາຊາວ ຮອງເຈົ້າຄອງ, ຫົວໜ້າຄະນະສະເພາະກິດ ເພື່ອປ້ອງກັນ, ຄວບຄຸມ ແລະ ແກ້ໄຂການແຜ່ລະບາດຂອງພະຍາດ ໂຄວິດ - 19 ນະຄອນຫຼວງວຽງຈັນ, ທ່ານ ດຣ ສີສະຫວາດ ສຸດທານີລະໄຊ ຮອງຫົວໜ້າກົມຄວບຄຸມພະຍາດຕິດຕໍ່, ກະຊວງສາທາລະນະສຸກ ພ້ອມດ້ວຍຄະນະຈາກ ຫ້ອງການສົ່ງເສີມ ແລະ ຄຸ້ມຄອງເຂດເສດຖະກິດພິເສດ ຂັ້ນສູນກາງ ແລະ ນະຄອນຫຼວງ, ພະແນກສາທາລະນະສຸກ, ພະແນກອຸດສາຫະກໍາ ແລະ ການຄ້າພະແນກແຮງງານ ແລະ ສະຫວັດດີການສັງຄົມ, ສະຫະພັນກໍາມະບານ ແລະ ເມືອງໄຊເສດຖາ ລົງປະເມີນຕີລາຄາ, ກວດກາ ມາດຕະການປ້ອງກັນ, ຄວບຄຸມ ແລະ ແກ້ໄຂການແຜ່ລະບາດຂອງພະຍາດ ໂຄວິດ - 19 ຢູ່ບັນດາໂຮງງານ ແລະ ບັນດາໂຄງການໃຫຍ່ ພາຍໃນເຂດພັດທະນາກວມລວມໄຊເສດຖາ ຈໍານວນ 5 ແຫ່ງ:1 ບໍລິສັດ ໂຮຢາ ລາວ ຈໍາກັດ (ຜະລິດເຄື່ອງມືທາງການແພດ ແລະ ເຄື່ອງມືເທັກໂນໂລຊີ), 2 ບໍລິສັດ ໄທຄິຊາ ລາວ ຈໍາກັດ (ເປັນບໍລິສັດທີ່ສະໜອງທາງດ້ານເຕັກນິກ), 3 ບໍລິສັດ ຊັງໂກ ຄອນກຣີດ (ຜະລິດຄອນກຣີດ) ລາວ, 4 ບໍລິສັດ ເປໂຕຣເຄມີ ຈໍາກັດ (ໂຮງກັ່ນນໍ້າມັນ), 5 ບໍລິສັດ ຄວາມຫວັງໃຫມ່ ລາວ ຈໍາກັດ (ຜະລິດຫົວອາຫານ) ຜ່ານການລົງກວດກາບັນດາໂຮງງານ ແລະ ກິດຈະການຂອງບໍລິສັດ ຄະນະສະເພາະກິດ ໄດ້ຮັບຟັງການລາຍງານສະພາບ ແລະ ຂໍ້ສະເໜີຕ່າງໆ ພ້ອມທັງໄດ້ແນະນໍາການຈັດຕັ້ງປະຕິບັດ ດັ່ງນີ້:
1. ໂຮງງານໃດທີ່ຈະເອົາພະນັກງານ-ກໍາມະກອນ ຢູ່ນອກໂຮງງານເຂົ້າມາເຮັດວຽກ ຕ້ອງປະຕິບັດຕາມມາດຕະການຂອງຄະນະສະເພາະກິດວາງອອກ ຢ່າງເຂັ້ມງວດ ໂດຍຕ້ອງຄັດກອງລະອຽດ, ຜ່ານການກວດ RAPID TEST ຈາກເຈົ້າໜ້າທີ່ສາທາລະນະສຸກ, ເຂົ້າຈໍາກັດບໍລິເວນ 14 ວັນ ຢູ່ຫໍພັກ, ບໍ່ໃຫ້ໄປປົນກັບຫໍພັກອື່ນເດັດຂາດ ແລະ ໃຫ້ມີເຈົ້າໜ້າທີ່ເວນຍາມຕະຫຼອດ 24 ຊົ່ວໂມງ ໂດຍຜັດປ່ຽນພຽນກັນເທື່ອລະ 2-3 ຄົນ; ຢູ່ຫໍພັກ ຕ້ອງມີລະບົບປະຊາສໍາພັນ, ມີກິດຈະກໍາອອກກຳລັງກາຍ ເພື່ອເຮັດໃຫ້ອາລົມຈິດຂອງພະນັກງານ-ກໍາມະກອນ ແຈ່ມໃສ.
2. ໂຮງງານໃດທີ່ມີພະນັກງານ-ກໍາມະກອນ ຢູ່ເຂດ/ບ້ານແດງ ແມ່ນບໍ່ອະນຸຍາດໃຫ້ເຂົ້າມາເຮັດວຽກເດັດຂາດ, ສ່ວນຜູ້ທີ່ນອນຢູ່ໂຮງແຮມ ຫຼື ຫໍພັກ ນອກໂຮງງານ ແມ່ນໃຫ້ມີເຈົ້າໜ້າທີ່ເວນຍາມຕະຫລອດ 24 ຊົ່ວໂມງ ໂດຍຜັດປ່ຽນພຽນກັນເທື່ອລະ 2-3 ຄົນ ແລະ ໃຫ້ມີດ້ວຍລົດຮັບ-ສົ່ງ, ບໍ່ໃຫ້ເດີນທາງມາເຮັດວຽກດ້ວຍຕົນເອງ; ກໍລະນີເກີດມີການຕິດເຊື້ອພະຍາດ ໂຄວິດ - 19 ບັນດາໂຮງງານ ຫຼື ເຈົ້າຂອງກິດຈະການ ຕ້ອງຮັບຜິດຊອບຄ່າໃຊ້ຈ່າຍຊ່ວຍພາກລັດ.
3. ໃຫ້ຮີບຮ້ອນດໍາເນີນການ ໃຫ້ພະນັກງານ-ກໍາມະກອນ ຂອງຕົນ ໄດ້ຮັບການສັກວັກຊີນ ຄົບ 2 ເຂັ້ມ.
4. ໂຮງງານຕ້ອງສະໜອງອາຫານໃຫ້ພະນັກງານ-ກໍາມະກອນ ຂອງຕົນ ໂດຍບໍ່ໃຫ້ເຂົາເຈົ້າອອກໄປຊື້ອາຫານຢູ່ຂ້າງນອກມາກິນ, ອາດຈະເຮັດສັນຍາກັບຮ້ານຊຸບເປີມາເກັດ, ຮ້ານມິນິມາດ ຫຼື ພໍ່ຄ້າຄົນກາງ... ມາສົ່ງວັດຖຸດິບປຸງແຕ່ງອາຫານໃຫ້ ເພື່ອຫຼຸດຜ່ອນຄວາມສ່ຽງໃນການອອກຕະຫຼາດເອງ.
5. ການເຮັດອະນາໄມ ຕ້ອງເຮັດເປັນລະບົບຄັກແນ່ ແລະ ມີໜ່ວຍງານມາເອົາຂີ້ເຫຍື້ອໄປຖິ້ມສະເພາະ.
6. ມອບໃຫ້ຫ້ອງການຄຸ້ມຄອງເຂດເສດຖະກິດພິເສດ ນະຄອນຫຼວງວຽງຈັນ ສົມທົບກັບພາກສ່ວນກ່ຽວຂ້ອງ ເຮັດບັນທຶກກັບບັນດາໂຮງງານໄວ້ ແລ້ວປະເມີນຄືນ ຕາມ 10 ຂໍ້ຄວນປະຕິບັດ ສໍາລັບສະຖານທີ່ເຮັດວຽກ ແລະ 35 ຕົວຊີ້ວັດ ຂອງການປະເມີນ, ຖ້າບໍລິສັດ ຫຼື ໂຮງງານໃດປະຕິບັດໄດ້ ກໍ່ໃຫ້ເປີດດໍາເນີນກິດຈະການ, ແຕ່ຖ້າປະຕິບັດຕາມບໍ່ໄດ້ ກໍ່ໃຫ້ປິດກິດຈະການກ່ອນຊົ່ວຄາວກ່ອນ.



ຄະນະຄຸ້ມຄອງເຂດເສດຖະກິດພິເສດນະຄອນຫຼວງວຽງຈັນ
Vientiane Spacial Economic Zone Authority
ຕິດຕໍ່ພວກເຮົາ

ເບີໂທ : +856 21 419336
ແຟັກ : +856 21 419336
ອີເມວ : info@vseza.gov.la

ຜູ້ເຂົ້າຊົມເວັບໄຊ

6663
Copyright © 2023 VSEZA , All rights reserved